Toko 31 ki he sikuati ‘a e Taiseni ki Siapaní
Fa‘u ‘e Tevita K. Takitaki

NUKU‘ALOFA— ‘E ‘uluaki fetaulaki ‘a e timi kilikiti fakafonua ‘a Tongá, Taiseni XI mo Singapoa ‘i he ‘aho 19 ‘o Mê kimu‘a pea nau toki hoko atu ki he fe‘auhi kualifaí ki Siapani ‘i he mahina tatau.

Ko e ola ‘eni ‘o e fêngaue‘aki vâofi ‘a e Komiti Kilikiti Fakafonua ‘a Tongá mo e Komiti Kilikiti ‘a Mamaní ‘a ia na‘e fakamahino atu kimu‘a ‘oku ‘ikai ko e Komiti Kilikiti ‘a e Tonga Kotoá.

‘Oku kau ‘a e va‘inga ni ‘i ha teuteu lelei ki he timí kimu‘a pea nau toki hoko atu kenau fetaulaki mo e ngaahi timi hau ‘i Siapaní.

‘I he taimi tatau kuo ma‘u ha fakahâ mei he Komiti Kilikiti Fakafonua ‘a Tongá ‘e faka‘osi ‘enau teuteu ki Nu‘usila kimu‘a pea nau toki hoko atu ki Singapoa ‘i he ‘aho 17 ‘o Mê.

Kuo filifili ‘e he kau faifili ‘o e Komiti Kilikiti ‘a Tongá ha sikuati toko 31 ke fili mei ai ‘a e timi ‘a e Taiseni XI ‘a ia tenau fakafofonga‘i atu ‘a e fonuá ki he fe‘auhi kualifai ki Siapani pe kohai ‘e hû ki he tau‘i ‘a e Ipu ‘a Mamaní.

‘Oku kau ki he sikuati ni ha toko taha mei ‘Aositelelia, tolu mei Nu‘usila, taha mei ‘Eua pea ko e toenga mei he ngaahi kalapu pe ‘i Tongatapu ni.

Na‘e fai foki ‘a e fakaafe ki he ngaahi timi ‘a e komiti ‘a e Tonga Kotoá ka na‘e ‘ikai pe tenau fie kau ki he fe‘auhi ni tupu mei he‘enau fakakaukau ko kinautolu tenau fakafofonga‘i ‘a e fonuá ka ‘i he aofangatukú foki kuo kaniseli kinautolu kae tali pe ‘a e Komiti Kilikiti ‘a Tongá.

Kaekehe mei ‘Aositeleliá ‘oku kau kiai ‘a ‘Oteti Fâhina; Maunaloa Faivakimoana, Savelio Tamale mo ‘Aiveni Ta‘akimoeaka mei Nu‘usila.

‘I Tonga´ ni ko Sione Pâkofe mo Leone Taani mei he kalapu Finefeuiakí; Mafi Langi, ‘Efalame Laumape, Fanua Taufa, Piukala Fatafehi mo Samiu Moeakiola mei he kalapu Vai ko Puná; Mohokoi Kionia, Selemaia Kalokalo mo Viliami Mataitonga mei he Vaikeli ‘o Sekopé; Sio Hale mei he Mo‘onia; Kapetaua Vaolupe, Tatifi Kivalu, Selusalema Vite, Maikolo Pâkofe mo Ma‘ulupe Pale mei he Tu‘ilokomaná; Sione Pese, Livi Pese, Loutalo Vite mo ‘Ulise Fâhina mei he Akoakó; Fakava‘inga Finau, Salesi Tu‘akoi mo Simione Lâtû mei he Potungâue Talavou; Viliami Tupouniua, Maamaloa Tauêlangi mo Langafo‘ou Malele mei he Mapuhoi ‘e Tevoló mo Tevita Mafua Smith mei ‘Eua.