Timi U19 'a Tonga ki he tau'i 'a e Ipu 'a Mamaní
Fa'u 'e Tevita K. Takitaki

NUKU'ALOFA- Kuo mahino 'a e toko 26 tenau fakafofonga'i atu 'a e fonuá ki he tau'i 'o e Ipu 'a Mamani 'i he 'akapulu 'a e U19 'i Durban , Saute 'Afilika 'a ia 'e kamata 'i he 'aho 27 'o Ma'así.

Na'e fai foki 'a e lâulea lahi 'i he tuai koia hono fakahingoa 'o e toko 26 'e folau ki Saute 'Afiliká ka 'i he fakamatala 'a e faiakó, Vaitâ Ueleni ko e toki mâau mâlie 'eni 'a e ngâue na'e fai ki hono filifili lelei 'o e timí.

Na'e fakahoko foki hono sivi'i faka'osí 'o e timí 'i he fetaulaki 'a e U19 mo e U21 'i he Falaite kuo'osí 'i he'ena tau kâsete ki he fetaulaki koia 'a e timi Palesitení mo e Samoa/Auckland A 'i he mala'e Teufaivá.

Ko e me'a na'e mahino mei he va'inga ni 'a e lelei mo ma'olunga 'a e tu'unga va'inga 'a e fouetí ka ki he tautua'a 'oku fiema'u ke fai ha ngâue lahi kiai kimu'a pea nau toki hoko atu ki he fe'auhí.

'Oku kei lahi pe 'a e hapo tô mo e kovi 'a e tali tangatá kae mahalo ko e tupu pe ia mei he pelepela mo hekeheke 'a e mala'e 'i he 'uha lahi na'e tô 'i he Falaite kuo'osí.

'Oku tonu pe ke fai ha sio ki he me'a ni ke fakapapau'i he 'oku 'ikai te tau 'ilo pe 'e 'afua pe 'e 'uha 'a e feitu'u 'oku fai ai 'a e va'ingá.

Na'e fakahâ foki 'e he faiakó 'oku lele lelei pe 'a e me'a kotoa ka ki he'enau teuteú 'oku lelei 'aupito pea kuo a'u ki ha tu'unga fakafiemâlie 'aupito 'a e tu'unga fiti 'a e kau va'ingá.

Kaekehe ko e toko 26 kuo filí 'oku kau ki ai 'a Paea Sisitoutai, 'Isileli Fataua, Siaosi Hurrell, Taina Samisoni, Soane Lakalaka, 'Etuini Pongi, Tevita Tangi, Kaufusitu'a Manoa, Lopeti Liku, Taufa Pepa, Peni To'ia, Sione 'Onesi, Timote Militoni, Lepuhâ Lâtû'ila, Morrison Dansey, Manu 'Ahota'e'iloa, Lata'imuli 'Anitoni, Sepuloni Makaafi, Heamani Paea, Sione Lêhâ'uli, Tupou Palu, Uinitoni Kakau, Saula Ma'asi, Sione Lavaka, Sonatane Sefanaia mo Mafile'o Pi'ei.

'Oku pule 'i he timi 'a Tu'amelie Fâaitu'a, faiako 'a Vaitâ Ueleni, faifakamalohisino 'a Semisi Fonua pea toketâ 'a Lisiate 'Ulufonua.

Na'e toe pehê foki 'e Vaitâ na'e 'i ai 'a e toko fitu na'e fakafalala kiai 'a e timí ka kuo nau takitaha folau atu kinautolu ki muli 'o va'inga mo ako sikolasipi ai.

'Oku kau foki 'i he ni'ihi ko 'ení 'a e sekeni tapu toe afe koia ko Kaiongo Tupou 'a ia kuo ne va'inga mo ako 'i Siapani, Rutikha 'Ilolahia pea pehê kia Kilifi Fangupô 'a ia kuo na hiki atu kinaua 'o ako mo va'inga 'i Nu'usila.

'I he kulupu 'oku va'inga mo Tongá 'oku kau kiai 'a 'Amelika, Uruguay mo Namibia 'a ia 'e 'uluaki fetaulaki 'a Tonga mo 'Amelika 'i he 'aho 27 'o Ma'asi, va'inga mo Namibia 'i he 'aho 31 pea toki fetaulaki mo Uruguay 'i he 'aho 4 'o 'Epeleli.

'Oku 'i ai 'a e faingamâlie ma'a Tonga ni 'o kapau tenau kau 'i he timi 'e ono lelei taha 'i he fe'auhí 'a ia 'e 'otometiki pe 'e nau kualifai ki he fe'auhi ka hokó.

Ko e ngaahi timi 'e 'ikai tenau kau 'i he timi lelei taha 'e onó pea tenau kei va'inga kualifai pe kinautolu 'o hangê koia na'e fou hake ai 'a Tonga ni 'i he ta'u kuo'osí 'i he'enau va'inga mo Fisi mo Ha'amoá.

Ko e ngaahi fakamole foki ki he folau ko 'eni 'oku meimei fua kotoa 'e he Poate 'Akapulu 'a Mamaní tukukehe ange 'a e totongi ki he nofo'angá 'oku peseti 'e 80 'a e IRB kae peseti 'e 20 'a e Poate 'Akapulu 'a Tongá.

'E mavahe atu 'a e timi 'i he 'aho 18 'o Ma'así pea nau toki foki mai ki Tonga ni 'i he 'aho 20 'o 'Epelelí.