Ikuna Michael Burling fe'auhi fânifo Oceania
Fa'u 'e Moeke Moala

SEN¸: Na'e foki atu he Tu'apulelulu 'aho 19 'o Fepuelí, 2004 'a e timi fânifo 'a Tongá hili ia 'enau kau mai ki he fe'auhi fânifo 'a e Oceania Cup 2004, 'a ia na'e fakahoko 'i Kuinisilani mei he 'aho 7 ki he 'aho 14 'o Fepueli 2004. Ko e timi 'a Tongá na'e fe'auhi ai 'a Michael Burling ta'u 20 mo Chas Egan 'i he Open Mens, pea toe fe'auhi 'a Michael he Longboards.

'I he fe'auhi 'a e Junior Mens na'e kau ki ai 'a Andrew Taungâhihifo ta'u 17 mo Peter Johnson ta'u 14, pea talifaki 'a 'Alani Burling ta'u 8. 'I he fe'auhi leva 'a e Open Womens na'e kau ki ai 'a 'Anau Burling ta'u 17 mo Lavinia Burling ta'u 14, pea ko e pule 'i he kau folaú ko Sêsika Burling. Ko e ola leva eni e fe'auhi 'a e timi 'a Tongá, 'i he Longboards; na'e ikuna'i ia 'e Michael Burling, Open mens; na'e fika 4 'a Michael kae 9 'a Chas, Junior; na'e fika 9 'a Peter kae 10 'a Andrew, Open Womens; na'e fika 3 'a 'Anau kae 5 'a Lavinia.

Ko e fe'auhi 'o e ta'u ní na'e kau mai ki ai 'a e ngaahi fonua 'e 7 mei he Pasifikí, ko 'Aositelêlia, Fisi , New Caledonia , Nu'usila, Ha'amoa, Tahiti mo Tonga . Fakatatau ki he fakamatala 'a Michael Burling ki he Taimi 'o Tongá , ko e fe'auhí 'oku vahevahe 'a e kalasi kotoa ki he ngaahi Heat pea 'oku toko 4 ki he Heat. 'Oku tuku mai 'a e taimi kapau ko e miniti 'e 20, te te feinga leva ke te fânifo 'i he lahi taha 'o e ngaahi fo'i peau te te lavá 'i he miniti 'e 20 ko iá.

Na'e pehê 'e Michael, kapau te te tô 'i he Heat 'e lava pê ke toe ma'u hato faingamâlie ke te toe feinga ai ki 'olunga ka kuopau ke te faka'ali'ali ha fânifo fakaholomamata ki he kau fakamaaú ke hiki hake ai 'ete poiní. 'I he lolotonga e fe'auhi 'a Michael 'i he Open Mens na'e tô 'o tau e papa fânifó 'i hono palalulú. Na'á ne hoko atu ai pê 'o 'osi e fe'auhí ka na'e uesia 'ene fe'auhí he uhuuhu hono palalulú.

'Oku 'iloa foki 'a Michael mo 'Anau Burling 'i he Pasifikí he sipoti fânifó pea ko e tuonga'ane mo e tuofefine ta'u si'isi'i taha eni kuó na lavame'a he mala'e ko 'ení 'o fakafehoanaki ki he kau fânifo 'oku nau fe'auhi 'i he kalasi Opens.

'Ikai ngata pê he'ena ma'u mêtali koula he South Pacific Games ma'a Tonga he ta'u kuo 'osí ka na'e toe ma'u foki 'e Michael 'a e tangata sipoti lelei taha 'o e ta'ú 'i Tongá, pea na'á ne toe ma'u 'a e pale ki he Pacific Open Mens Champion 2003.

Na'e pehê he pule folaú Sêsika Burling, na'e hoha'a 'i he fe'auhi 'o e ta'u ní he na'e ki'i ta'emaau 'enau fakalele 'a e polokalamá. Na'á ne pehê na'e maau ange 'a e fe'auhi ia he ta'u kuo 'osí 'o fakafehoanaki mo e fe'auhi 'o e ta'u ní. Ko e fe'auhi foki 'o e ta'u kuo 'osí na'e fakahoko ia 'i he matâtahi Ha'atafú 'a ia ko e ta'u 'aki ia 'e 3 'a hono fakahoko 'i Tongá.

Na'e pehê 'e Sêsika 'i he hili ha uike 'e 2 mei heni 'e folau hifo ai 'a e timi fânifo fefine 'a Tongá ke nau kau ki he fe'auhi lahi fakata'u 'a Nu'usilá. 'Oku fakafuofua ki he fânau fefine 'e toko 8 he timi ko 'ení.