Pekia Nôpele Ma'atu ko e 'alo fika 3 Tu'i´

NA'E pekia 'a 'Eiki Nôpele Ma'atu Fatafehi Alaivahamama'o Tuku'aho, ta'u 49, 'i he Falemahaki Vaiola´, fakafuofua ki he 4 hengihengi Tusite´. 'I hono 'ave 'a e ongoongo´ ni ke paaki´ ne fakaangaanga ke fakahoko e me'a faka'eiki´ he Tusite kaha'u´ ki he Vila 'o e Tama Pilinisi Kalauni´, Tupouto'a.

Ko Nôpele Ma'atu´ ko e 'alo hono tolu ia 'a e Tama Tu'i´, Taufa'ahau Tupou IV mo Kuini Halaevalu Mata'aho. Na'e mali ia mo e mokopuna 'a Malietoa Tanumafiili II 'o Ha'amoa´, 'Eiki Alaileula Poutasi Jungblut 'i he 'aho 11 'o Siulai, 1989. 'I he taimi na'e paaki ai e pepa´ ni, na'e lolotonga teu'i 'a Mala'e Kula ki he me'a faka'eiki´. 'I he 'aho 29 'o Sepitema, 1979, na'e fakanofo 'a Pilinisi Fatafehi Alavahamama'o ki he tofi'a 'o Ma'atu´.

Ko e ta'u makehe foki eni ki he Siasi Uesiliana´, he na'e fakahoko mo e fuofua malanga 'a Nôpele Ma'atu´ 'i he Siasi Uesiliana 'o Kolonga 'i he Sâpate Ako´. Na'e toe kau foki 'a e Nopele´ ni he hiki nima ke fakafepaki'i 'a e liliu ko ia e kupu 7 'o e Konisitutone´.

Na'e to'o 'a e totonu 'a 'Eiki Ma'atu ki he tâloni´ 'i he'ene 'uluaki mali mo Heimata'ula Kaho, 'a ia kuo ne 'osi pekia´, ko e tama ia 'a Tu'imala Kaho.

'Oku 'i ai e fânau 'e toko fâ 'a Nopele Ma'atu mo 'Eiki Alaileula, 'a ia ko 'Eiki Sitiveni 'Alavahamama'o Polule'ulingana Tanusia-ma-Tonga, 'Eiki Salote Haim Hadessah Be Yardena 'Alanuanua, 'Eiki Sione Ika Mafana Ta'anekinga 'o Tonga Tuita 'a ia na'e pusiaki'i 'e Nôpele Tuita mo Pilinisesi Pilolevu Tuita´, pea ko si'isi'i taha´, ko 'Etani Ha'amea Tupoulahi Tu'uakitau Ui Tu'alangi Tuku'aho.