Puke e Tonga he kakaa'i ha tangata'eiki

KUO puke 'e he kau Polisi´ 'a e matapule Tonga ko Sosaia Limu Me'afo'ou ta'u 44 nofo Redwood ki he tukuaki'i ko 'ene kakaa'i ha tangata'eiki ta'u 87 'o ma'u ai ha pa'anga laka hake he miliona´. 'Oku fakafuofua ko e $1.3 miliona.

'Oku pehee ko Sosaia´ 'oku ne fakalele 'ene ki'i ngaue 'iate fakamatamatalelei 'api (Landscaping). Ko hono puke ko 'eni´ 'oku kei fakatotolo pe e kau Polisi´ ki he'ene ngaahi ngaue na'e fai´. Ko 'ene tu'u he taimi ni 'oku tukuaki'i ia ki he kaiha'a, pa'usi'i e motu'a toulekeleka pea pehee ki he kakaa 'i he feinga ke hao mei tukuhau´ 'i he ngaue na'a ne fai´.

'Oku pehee ko e ta'u 'e 6 kuo 'osi´ na'e fetaulaki ai 'a Sosaia mo e tangata'eiki´ ni. Na'e toutou koleange ai 'a Soasia ki he tangata'eiki´ ha silini ke fai 'aki 'ene ki'i ngaue 'i hono konga 'api 'i Tonga . Na'e toutou fai e kole pa'anga ni pea hu'uuhu'u ai e famili 'o e tangata'eiki´ 'o nau launga ki he kau Polisi´.

Ko e lava 'eni e ta'u 'e taha 'a e fakatotolo'i 'e he kau Polisi´ 'a Sosaia´ 'o kau ai 'enau huke 'ene lekooti tukuhau´ mo e ngaahi alaa me'a pehee. 'Oku toe tukuaki'i ia ki he hia matea ko 'ene ngaue'aki ha laiseni ngaue 'a ha taha kehe.