Ikuna'aki 'e Ellerslie e sivi hiva´ e teunga lelei´

'I HE sivi hiva 'a e Kolisi tutuku 'o e Kolisi ko Tupou 'o loto 'Okalani´ na'e veipaa ai 'a e kau hiva e kau Kolisi tutuku 'o Ellerslie pea mo e kau kolisi tutuku 'o Otahuhu´ pea ne ikuna ia 'e Ellerslie e fakakatoa´.

Ko e sivi hiva ni na'e hu ai e fo'i sivi makehe ia 'a ia ko e teunga lelei taha´ pea ko e me'a ia na'e ikuna ai 'e Ellerslie e fe'auhi fakakatoa´, he ka ne 'ikai ia ne mei tata ia 'e Otahuhu.

'I he fakamatala 'oku ma'u 'e he nusipepa ni ko e toki sivi hiva 'eni 'a e Kolisi tutuku e Kolisi ko Tupou´ 'oku kau ai e teunga lelei´ 'i hono fakamaau'i´. Pea ne 'ikai ke mateuteu ki ai e kau hiva ia 'a Otahuhu´. 'I he fakama'opo'opo e poini e sivi hiva´ ne ma'olunga ai 'a Otahuhu ka ne lakasi'aki 'e Ellerslie e pale ki he teunga lelei´ he ne 'ikai ke kau 'a Otahuhu ia he lau´.

Kaekehe ko e ola e sivi hiva´ ni na'e pehe ni. Ko e hiva tu'utu'uni´ na'e ikuna ia 'e Otahuhu, 2 'a Ellerslie pea 3 'a Mangere. Ko e hiva fili´ na'e ikuna ia 'e Ellerslie, 2 'a Otahuhu pea 3 'a Dominion. 'I he fe'auhi ki he teunga lelei´ na'e ikuna ia 'e Ellerslie, 2 'a Mangere pea 3 'a Glen Innes.