|
Loto Kosilio Faiongoongo´ faka'ilo pule'anga´
fa'u 'e Mâteni Tapueluelu
KUO loto e fakataha 'a e Kosilio e kau Faiongoongo 'a Tonga´ ke fakahoko ha 'eke fakalao (Judicial Review) 'o e tu'utu'uni 'a e pule'anga´ 'o iku ta'ofi ai e laiseni 'a e ongo nusipepa 'e ua 'i Tonga , Taimi 'o Tonga´ mo e Kele'a´.
Ko e fakataha eni 'a e Kosilio´ ne fai he efiafi Falaite kuo 'osi´ hili ia e ako 'aho 'e tolu ki he 'êfika 'o e ongoongo´. Ko e fokotu'utu'u´ ke fakahoko 'a e hopo ko eni´ kae fai ha kole ki he Kautaha 'a e kau Faiongoongo 'a e Kominiueli´ (Commonwealth Press Union) ke nau tokoni'i fakapa'anga.
Ko e Kosilio´ 'oku Sea ai 'a Pesi Fonua ha'ana 'a e Makasini Matangi Tonga´.
Ko e 'eke fakalao eni 'e ua 'oku laini mai 'i he kaha'u´ na 'i he liliu 'e he pule'anga´ e kupu 7 'o e Konisitûtone´, 'a ia 'oku kau ki heni e 'eke fakalao 'oku taki 'e he kau fakafofonga e kakai´ ki hono liliu 'o e Konisitûtone´.
|
