|
Tali e laiseni 'a Filo´
Fa'u 'e 'Ulu'alo Po'uhila
NA'E ongo'i pe 'e he pule maloloo e nusipepa Taimi 'o Tonga´ 'i Tonga´, Filo 'Akau'ola koe'uhi´ ko 'ene 'uluaki ngaue ma'ae Taimi 'o Tonga´ 'e faingata'a ke 'oange ai 'e he pule'anga´ ha'ane laiseni ki he'ene nusipepa fo'ou´.
Na'e 'uluaki fakahu atu 'ene kole nusipepa´ 'i he malumalu e kautaha ko e Vula News Ltd 'a ia na'a ne fakafonu atu ko ia pe 'oku Faipulusi mo 'Etita he nusipepa´. Ko e me'apango he ne 'ikai ke tali ia.
Na'e fakakaukau ai 'a Filo ke to'o hono hingoa´ kae kumi ha taha ke 'Etita´. 'I he vaha'a taimi nounou ko 'eni´ ne 'ikai ke ma'u ha taha ko ia na'a ne kole pe ai ki hono ta'okete´, Patele Seluini 'Akau'ola SM ke ne 'Etita´ 'o toe fakahu'aki, pea tali mai ko 'eni´.
"He me'a faingata'a mo'oni ko e ngaue´ ia he toe 'ai ke kole laiseni´, ka neongo ia ne 'ikai fai ha holomui," ko e lau ia 'a Filo´ mo ne pehee 'oku ne poupou'i fefeka ke fai hano hopo'i e Pule'anga´ he liliu e konisitutone´ kae lava ke foki e ongoongo´ 'o tau'ataina mei he pule'anga´ 'o hangee ko ia kimu'a´.
'Oku fakalele e 'ofisi e nusipepa fo'ou ni mei Tungi Arcade pea 'oku fakangaue'i ai 'e Filo 'a e kau ngaue 'e toko 7 fakakatoa. 'Oku 'amanaki 'a Filo ke tuku atu 'enau fuofua nusipepa´ 'i he Tu'apulelulu 'o e uike ni 'a ia 'e paaki pe mei Nu'usila.
|
