Lavea he'ene tekolo'i 'a Sam Tu'itupou

KO E taha e ongoongo fakamamahi taha ki he faiako e timi Super 12 'a Kuinisilani´ pea pehee ki he'enau kau poupou´ ko e te'eki ko ia ke kamata e fe'auhi ia 'o e ta'u ni kuo lavea 'enau tangata na'e fai ki ai e fakatu'otu'a´, Julian Huxley.

Ko e lavea'eni 'a Julian 'i he'ene tekolo'i 'a e sekeni mohu faiva 'a e Auckland Blues, Sam Tu'itupou 'o motu ai hono kaungao´ 'i he miniti pe hono 18 e tau fakaangaanga 'a e ongo timi ni kimu'a he fe'auhi´. Na'e ikuna ai 'e 'Okalani e tau ni 'aki e kai 21 - 8.

Ko Sam 'oku 'iloa ia ko e tangata tali tangata fefeka malimali´, koe'uhi´ ko 'ene fai e me'a koe tali tangata he 'oku ne peluki e ngaahi fu'u siana lalahi´ 'o ta'efe'unga ia mo hono ki'i sino´. Pea ko 'eni 'oku toe a'u pe ki he'ene lele'i pulu´ 'oku hoko ai pe mo e lavea ia.

Ko Julian foki na'e foaki ki ai 'a e pale kko e tokotaha va'inga 'akapulu lelei taha ia 'i Kuinisilani he ta'u kuo 'osi´ pea ko e me'apango he na'e tui e tokolahi he'ikai ke ta'ehu e talavou ni ia ki he Wallaby he ta'u ni.

Ko e tu'u he taimi ni 'oku kai me'a vaivai atu 'a Julian ia pea toe mahino 'eni ia 'e a'u pe 'o uike 'e 6 'ene maloloo 'ana mei he va'inga´ koe'uhi´ ko e lavea ko 'eni´.

Ko e mole lahi 'eni ki Kuinisilani koe'uhi´ na'e hanga 'e he faiako 'a Kuinisilani´, Jeff Miller 'o teuteu'i 'a Julian 'a ia na'e 'ai ia kke 'unu mai ki he tu'unga feesi´ he 'oku lahi 'enau kau sekeni´ 'anautolu.

Neongo ia na'e pehee 'e Miller ko e anga ia e sipoti´ kuop[au ke fai e lavea pea 'e kei hoko atu pe 'ene timi´ 'a'ana ka 'oku ne monu'ia ke ne ma'u ha sekeni taukei hangee ko Steve Kefu´ ke ne hoko atu e fatongia´.

'I he tau ai pe ko 'eni´ ne toe 'asili ai pe e faingata'a'ia 'a e faiako ia'a 'Okalani´ koe'uhi´koe fihi ko ia 'ene kau kapakau´. Na'a ne to'o mai ai 'e ia 'a Mils Muliaina 'o le'okolo pea kapau 'e pehee 'e 'i ai e taha ia he'ene kau kapakau´'e taloifaki ia ka 'oku 'i 'Okalani´ e kau kapakau tu'ukimu'a taha 'a Nu'usila´ 'a ia ko Joe Rokocoko, Doug Howlett pea mo Rupeni Caucvaunibuca. 'I he tau ko 'eni mo Kuinisilani´ ma'e fu'u kalasi atu 'a Cauucaunibuca ia he sipinga va'inga na'a ne fai´ pea ne 'ai ai 'e ia e fo'i tata'o 'e taha.

Ko e fo'i fili pe ke fai´ kapau 'e fiema'u ke tau kotoa e kau tangata ni ko e 'omai 'a Mils Muliaina ia ki he senitaa, kapakau e ongo Fisi´ pea le'okolo leva 'a Howlett. 'Oku 'osi mahino ppe foki e tu'unga sekeni´ ia mo e feesi´ kuo sila'i ia 'e Sam Tu'itupou mo Carlos Spencer.