Ikuna 'e he Ha'amongá $1000 'a e fe'auhi 'a e Global Insurance
Fa'u 'e Tevita K. Takitaki

NUKU'ALOFA- Kuo ikuna 'e he timi kilikiti 'a e Ha'amonga 'a Mauí mei Niutoua 'a e pale $1000 'a e kautaha Global Insurance mo e Komiti Kilikiti 'a e Tonga Kotoá hili 'enau fakangata 'a e fakaaoao 'a e timi 'a e Vai ko 'Oá mei Puke 'i he Tokonakí 'aki 'a e kai 155-70 'i he mala'e 'Apifo'oú.

Neongo 'a e ulungia 'a e Vai ko 'Oá ka na'a nau foki fiefia kinautolu mo e pale ki he fika uá 'a ia ko e $800 fakataha mo e pale $200 ki he tangata teka lelei taha mo e va'inga fakalakalaka taha 'o e ta'ú 'a ia ko Pîkula Pese.

'I he fetaulaki 'a e Kaha'uolá mei Pea mo e Tapu Lulululu mei 'Eueiki ki he pale tolú mo e fâ na'e ikuna ia 'e he Kaha'uolá 'a ia ko e $500 fakataha mo e pale $100 ki he tangata tâ lelei taha 'o e ta'u 'a ia na'e fa'ao ia 'e he ki'i leka koia ko Po'uli Taulani.

'I he pale ki he fika fâ na'e foki fiefia ia mo e timi 'a 'Eueikí 'a ia ko e $300 ka 'i he 'asi 'a e Tapu Lulululú 'i he ta'u ni 'oku vave 'aupito 'a e fakalakalaka 'a e kilikití 'i he timi ni.

Mahalo 'e kau 'a e timi ko 'eni 'i he fakamamahí 'i he ta'u ngaahi fe'auhi 'o e ta'u ni he neongo ko honau fuofua ta'u 'eni 'i he va'inga kilikití ka na'a nau fakamamahi'i 'e kinautolu 'a e ngaahi timi tâlâ mo fuoloa 'i he kilikití 'i he ta'u kuo'osí.

Kaekehe 'i he tau lahí koha va'inga na'e matu'aki mâlie mo fe'au'auhi mo'oni pea neongo na'e lelei 'aupito hono tautua'a'i 'e he Vai ko 'Oá 'a e kau tâ 'a e kau to'a mei Niutoua ka 'i he taimi na'e tâ tulikai ai 'a e kau to'a mei Puké na'e mahino 'a e lelei ange 'a e kau teka 'a Niutouá.

'I hono pukepuke 'e he timi 'a e Vai ko 'Oá 'o e kai 'a e Ha'amongá 'i he taimi na'a nau tâ ai na'e matu'aki malu 'aupito pea na'e 'i ai 'a e 'amanaki 'a e kau mamata na'a nau mamata'i 'a e tau ni ngalingali na'a ikuna'i 'e he Vai ko 'Oá.

Ka ko e me'a foki kenau 'iló ko e timi hau 'a e Ha'amongá ia pea kuo fuoloa ta'u 'a 'enau fai 'a e kilikití 'a ia na'a nau tuku'i mai 'enau tangata teka vilo mo ulo koia ko Kaluseti 'Ofahulu kene fakanofonofo 'a e kau tâ lalahi koia 'a Puké.

Neongo na'e tokolahi mo poupoua 'a e kau fakakaekae ma'ae Vai ko 'Oá ka na'e hangê 'oku toe oma ange ai 'a e teka ia 'a Kalusetí 'o ki'i hohoko ai 'a e mate 'a e kau tâ 'a Puké.

'I hono fakahoa 'a e ongo timi ni na'e mahino 'a e matu'otu'a mo taukei ange 'a e Ha'amongá ka ki Puke ko e kau leka kotoa 'a ia na'e taki'i mai ia 'e Tomu Fohe.

Kaekehe na'e 'uluaki tâ 'a e Ha'amongá 'o ma'u 'a e kai fakakâtoa 'e 155 kuo nau mate kotoa 'i he 'ova 'e 26 mo e fo'i pulu 'e ua ka 'i he tâ tulikai 'a e Vai ko 'Oá na'e ma'u pe 'a e kai 'e 70 'i he 'ova 'e 13 mo e fo'i pulu 'e nima kuo nau 'osi kotoa 'i he mate.

Na'e 'ikai ke anga 'a e Vai ko 'Oá 'i he mate vave pehê ni kimu'a 'a ia ko hono mo'oní na'e fo'ou 'a e 'atâkaí kia kinautolu 'i hono mamata'i 'enau va'ingá.

Ko e kau tâ lelei 'a e Ha'amongá na'e takimu'a ai 'a Totoa Pôhahau ko e kai 'e 38, Kali Foliaki ko e kai 'e 25, Feleti Kaulave kai 25 mo e te'eki ke mate, Kaluseti 'Ofahulu kai 17 mo Mohokoi Finau ko e kai 13.

'I he'enau kau teka leleí na'e takimu'a mei ai 'a Kaluseti 'Ofahulu 'a ia ko e 'ova 'e nima 'o mate ai 'a e toko fâ ki he kai 33, Sione Tafuna ko e 'ova 'e nima 'o mate ai 'a e toko fâ ki he kai 12 mo 'Opeti Fonua ko e 'ova 'e taha 'o mate ai 'a e toko taha ki he kai 11.

'I he kau tâ lelei 'a e Vai ko 'Oá ko Pafua Tupou ko e kai 'e 23, Filimone Moala ko e kai 'e 16 mo Pikula Pese ko e kai 'e 8.

'I he'enau kau teka leleí na'e kei takimu'a pe mei ai 'a Pikula Pese ko e 'ova 'e fitu 'o mate ai 'a e toko fâ ki he kai 33, Peiôneti Fehoko ko e 'ova 'e ono 'o mate ai 'a e toko tolu ki he kai 28 pea mo Pafua Tupou ko e 'ova 'e ono 'o mate ai 'a e toko tolu ki he kai 47.

'I he fetaulaki 'a e Tapu Lulululu mo e Kaha'uolá na'e 'uluaki tâ 'a e Tapu Lulululu 'o ma'u 'a e kai 127 kuo nau 'osi kotoa 'i he mate 'i he 'ova 'e 18 mo e fo'i pulu 'e fâ ka 'i he tulikai 'a e Kaha'uolá na'e ma'u 'a e kai 'e 131 'i he 'ova 'e 18 mo e fo'i pulu 'e taha pea kei toe mo e toko ua mei tu'a te'eki kena tâ.

'I he kau tâ lelei 'a e Kaha'uolá na'e taki'i mai ia 'e Tavite Matakaiongo ko e kai 'e 43, Po'uli Taulani ko e kai 'e 27, 'Atuloi Pâkofe ko e kai 'e 21 mo Lopeti Tupou ko e kai 'e 14 te'eki ke mate. 'I he'enau kau teka leleí ko Penisimani Lavaka ko e 'ova 'e fitu 'o mate ai 'a e toko nima ki he kai 18, Po'uli Taulani ko e 'ova 'e fitu 'o mate ai 'a e toko ua ki he kai 34, Samuela Tu'ineau ko e 'ova 'e fitu 'o mate ai 'a e toko taha ki he kai 17 mo Lopeti Tupou ko e 'ova 'e ono 'o mate ai 'a e toko taha ki he kai 21.

'I he kau tâ lelei 'a e Tapu Lulululu ko Liueli Naitoko ko e kai 'e 13, tau'aki kai 'e 13 'a Militoni Vea mo 'Ofa Kaifâ pea ko Tomasi Tavake ko e kai 'e 12.

'I he'enau kau teka lelei ko Sinipata Muli ko e 'ova 'e tolu 'o mate 'a e toko fâ ki he kai 13, 'Ofa Kaifâ ko e 'ova 'e nima 'o mate 'a e toko taha ki he kai 27, Kina Pôhiva ko e 'ova 'e taha 'o mate ai 'a e toko taha ki he kai 13 mo Niu 'Aho ko e 'ova 'e ono 'o mate ai 'a e toko taha ki he kai 33.