Ikuna 'e Tonga e peleti´ he toko 7 'a Uelingatoni

KUO hanga 'e he timi toko 7 'a Tonga´ 'o ikuna'i e peleti´ 'i he fe'auhi toko 7 'i Uelingatoni 'a e IRB pe ko e Poate 'Akapulu 'a mamani´ hili ia 'enau vevela'i 'a Kenya 'i he fainolo´ 'aki e kai 38 - 12.

Na'e 'ikai ke ngata pe he ikuna 'e Tonga e peleti´ ka na'a nau toe sila'i ai pe mo honau sea ki he fe'auhi toko 7 'a mamani 'oku 'amanaki ke fakahoko he ta'u fo'ou´. Ko e alea´ kohai pe 'i Tonga , Cook Is, Niue mo Papua Niukini 'e ma'olunga taha hono poini´ he fe'auhi ni ko ia ia 'e hu ki he ipu 'a mamani´ 'i Hong Kong he ta'u fo'ou´. Pea ne taki'i ai 'e Manu Vunipola 'ene timi´ mo e fo'i misiona ko ia´ 'o nau sila'i e sea 'o Tonga´.

Kaekehe kimu'a he fainolo ki he peleti´ na'e fu'u sai 'aupito e va'inga ia 'a Tonga´, tukukehe 'enau fuofua tau mo 'Asenitna´. Na'e fo'i heni 'a Tonga ko e 24 - 12 ka ko e me'a ia ke fai ha tokanga lahi ki ai. Ko e tau ni na'e tuli ai ha toko 4 ki tu'a 'i he ngaahi maumau lao hangee ko e tali fakatu'utamaki pea mo e tuki. Kapau na'e lava 'e Tonga kenau pule'i nautolu na'e mei toe saiange e feinga mai 'a Tonga´.

Kaekehe ko e tau fika 2 'a Tonga´ mo Saute 'Afilika pea na'e faka'ohovale'i ai 'e Tonga 'a mamani hili ia 'enau fakapatuu 'a Saute 'Afilika 'aki e kai 15 - 12. 'I he fe'auhi toko 7 'a Uelingatoni´ ko e fo'i me'a faka'ohovale 'e 2 na'e hoko ai´ 'a ia ko e peluki 'e Tonga 'a Saute 'Afilika´ kae peluki 'e Kenya 'a 'Aositelelia.

Na'e hanga foki 'e Saute 'Afilika ia 'o tele poko'i 'a 'Amelika he'enau fuofua tau´ pe pea na'a nau pehee mahalo tenau fai pehee ai pe ki Tonga . Ka 'i he kamata atu pe e tau´ kuo kolosi 'a Tevita Tu'ifua ia he laine tata'o 'a Saute 'Afilika´ 'o nau taki 5 - 0. Ne 'ai 'e 'Afilika 'enau tata'o 'e taha pea hu e 'aka´ 'o nau 7 ki he 5 ka ne taimi si'i mei ai kuo 'ai 'e Sione Langatau ia e fo'i tata'o hono 2 'a Tonga´ pea ta'ota'o atu mo e taha 'a Sila Va'enuku 'o nau taki ai ko e 15 - 7. 'I he tai'i e taimi´ kuo tata'o 'a Saute 'Afilika ka ne tomui e me'a kotoa kuo ikuna 'a Tonga ia.

Na'e hoko mai ai 'a Tonga 'o tele poko'i e timi 'a 'Amelika´ 'aki e kai 41 - 0 'o nau hu ai ki he kuata fainolo ki he ipu´.

Na'e kuata fanolo leva 'a Tonga mo Fisi pea na'e lahi 'aupito e faingamalie 'o Tonga ke nau ikuna'i e tau ni ka ko e ngaahi fehalaaki iiki pe. Na'e tu'u atu pe e kamata´ kuo 'ai 'e Tonga ia e fo'i tata'o 'e 2 'o nau taki ai ko e 10 - 0. Na'e a'u ki ha taimi ne tau toko 6 pe 'a Fisi ka na'e 'ikai ke lava 'e Tonga ke ngaue 'aonga'aki e faingamalie ko ia´. Ne tuli kai ai pe 'a Fisi 'o 'osi e taimi´ kuo nau ikuna ko e 19 - 10. Kapau na'e ikuna 'a Tonga 'e tohi'i leva he hisitolia´ ko e fuofua a'u ia 'a Tonga ki he semifainolo´.

Kaekehe ne heke mai leva 'a Tonga 'o tau'i e peleti´ 'o ne 'uluaki semifainolo ai mo Ha'amoa 'o nau uipi 'a Ha'amoa 'aki e kai 21 - 17 'o nau hu ai ki he fainolo´ mo Kenya. Na'e tokoto hifo 'a Tonga 'o lali 'a Kenya ke mahino ko 'enau palafu pe he'enau peluki 'a 'Aositelelia´.

Ne kamata atu pe e tau ni kuo hu atu 'a Stan Afeaki ia 'o 'ai e fuofua tata'o 'a Tonga´. Na'e tanaki atu ki ai mo ha ngaahi fo'i tata'o 'e 3 kehe 'o takitaha ai 'a Sila Va'enuku, Stan Afeaki pea mo Sikuti Vunipola 'o maloloo´ 'oku taki 'a Tonga ko e 26 - 0. 'I he tu'u hono ua´ na'e toki kolosi ai 'a Kenya he laine 'a Tonga´ tu'o 2, kae 'ai 'e Sione Langatau ia mo e tokotaha Tonga pe 'e taha e fo'i tata'o 'e 2 'o ikuna ai 'a Tonga ko e 38 - 12.

Ko e talu e kau mai 'a Tonga ki he fe'auhi 'akapulu toko 7 'oku mahalo ko e timi lelei taha 'eni 'a Tonga kuo ne kau atu ki ha fe'auhi. Na'a nau fiti 'aupito pea toe mahino e sai 'enau va'inga´. Ko e me'a pe ke fakalelei'i´ kenau pule'i nautolu 'o tuku e maumau lao´ (Discipline). 'E hoko atu ai pe e timi 'a Tonga´ ki he fe'auhi toko 7 'i Los Angeles 'a e IRB he uike kaha'u´. Ko e fe'auhi 'eni ia 'e ki'i kehe he 'oku lolotonga momoko 'a LA he taimi ni pea taimi lahi 'oku a'u pe 'o sinou.