Fakafaingata'a'ia'i e mitia´ 'i he Pasifiki´

'Oku kamata ke hoha'a 'a mamani koe'uhi´ ko e 'asi mai ko ia hono fakatanga'i e mitia´ 'i he Pasifiki´.

'Oku kamata pe e ta'u ni mo e longolongoa'a 'a e 'otu motu Pasifiki´ hono fakafaingata'a'ia'i e mitia´.

'I he 'otu Solomone´ kuo mole ha sea ia 'o e taha e kau Minisitaa´ koe'uhi´ ko 'ene fakamanamana'i e 'Etita e nusipepa Solomon Star, pea 'i Papua Niukini´ na'e hanga ai 'e ha kau kengi ia 'o tutu e 'ofisi e nusipepa ko e Wantok. Pea 'i Tonga´ kuo ngaue e pule'anga´ ke pule'i e ngaahi nusipepa´ hili ia hono liliu e Knisitutone´ 'o ne fakamafai'i pe e pule'anga´ kenau fa'u ha lao 'anautolu pe kenau pule'i 'aki e pepa´, pea 'ikai ke toe tali ai e laiseni 'a e nusipepa ni 'i Tonga´ pea pehee ki he Kele'a´.

'I Solomone´ na'e tautea ai 'i he fakamaau'anga´ 'a e Minisita Fetu'utaki´, Fefolau'aki vakapuna´ mo e fakamatala 'ea´ ko Daniel Faafunua ke ngaue popula he ta'u 'e 3 ko 'ene fakamanamana'i e 'Etita e Solomon Star, John Lamani 'i he tu'akolo 'o Honiara . 'Oku pehee na'e 'ita 'a Faafunua ia 'i ha ongoongo na'e paaki 'e he nusipepa ni he konga kimu'a e ta'u kuo 'osi´ 'o fekau'aki mo ha minisita na'e fuhu 'i he maketi´. Neongo na'e 'ikai ke hanga 'e he nusipepa ni ia 'o fakaha e hingoa e minisita na'e fuhu´ ka na'e 'ita ai 'a Faafunua ia 'o ne 'alu ai mo ha kau kengi ki he tu'akolo 'o Honiara´ 'o ta mai ki a John Lamani ke leleange ki ai.

'I he a'u atu 'a Lamani na'e fakamanamana'i ia 'e Faafunua 'o ne talaange ke totongi ange 'a e pa'anga 'Aositelelia 'e 1,000 koe'uhi´ ko 'ene lele'i e ongoongo´. Na'e iku totongi 'e Lamani pea ne launga ai ki he kau Polisi´ ka na'e 'ikai ke lava 'e he kau Polisi´ ia 'o fai ha me'a.

Ka 'i he hu atu ko ia e kau sotia fakamelino 'a 'Aositelelia, Nu'usila mo e Pasifiki´ na'e faka'ilo ai e Minisitaa ni ki he'ene taa'i ha fefine pea ne toe ta'aki hake ai mo e launga na'e 'ikai ke lava 'e he kau Polisi 'o Solomone´ 'o fai ha ngaue ki ai´ 'o hopo'i ko 'eni 'o mo'ua ai´.

Kimu'a atu ai´ na'e hanga ai 'e ha famili ia 'o ha 'ofisa polisi na'e lolotonga hopo'i 'o tuli'i e motu'a faitaa 'a e nusipepa 'e taha 'o taa.

Pea 'i he fonua ne tuku ki langi´ 'oku hangee ia ko Hina´ koe'uhi´ 'oku fakaanga'i ia 'e mamani he 'oku haa mai 'oku nau feinga ke pule'i e ngaahi nusipepa´ mo e ongoongo´ pea kuo tuku atu ai ha ngaahi fakafepaki fakamamani lahi ia 'o fekau'aki mo e me'a ni.

Kuo 'ikai ke tali e Taimi 'o Tonga´ ia mo e Kele'a´ 'a ee 'oku ne fa'a paaki mai e ngaahi ongoongo 'oku natula fakaanga'i e Pule'anga´ ka nau tali 'e nautolu e Kalonikali´ mo e Tonga Star 'a ee 'oku nau poupou nautolu ki he pule'anga lolotonga´.