Fakafepaki'i e laiseni ngaahi nusipepa´ 'e he kautaha 'a e kau Faiongongo´

KUO 'oatu 'e he kautaha 'a e kau Faiongoongo 'a mamani´ pe ko e IFJ (Internartional Federation of Journalists) ha'anau fakafepaki'i lahi 'a e feinga 'a e pule'anga Tonga´ ke pule'i e ongoongo´ 'i Tonga 'aki hono laiseni e ngaahi nusipepa´.

Ko e kautaha ko 'eni´ 'oku memipa ai ha kau faiongoongo 'oku 'ova honau tokolahi´ 'i he toko 5 kilu´ 'i he tapa kehekehe 'o mamani 'a ia na'a nau fakaha 'a 'enau ta'efiemalie hono ta'etali 'a e ngaahi nusipepa ke tufa 'i Tonga´ koe'uhi´ ko e lao fo'ou ko ia ne fatu 'e he pule'anga´ ke ne pule'i e nusipepa´ 'a ia 'oku 'ikai ai ke foaki e laiseni 'a e ngaahi nusipepa 'e ni'ihi 'o kau ai e nusipepa lahitaha 'a Tonga´, Taimi 'o Tonga´ , Kele'a´, Vula Production pea mo e makasini Matangi Tonga´.

Ko ia ne nau tuku atu ai ha kole 'a e kautaha ni ki he pule'anga Tonga´ ke ta'ofi leva hono hanga 'e he kau Polisi´ 'o tanaki e pepa´ mo e pa'anga fakatau´ mei he ngaahi falekoloa´.

'Ikai ke ngata ai´ ka na'a nau fakaha mahino ko e feinga ko ia 'a Tonga ke laiseni e ngaahi nusipepa´ pea pehee ki he ngaahi kautaha kenau tufaki atu e nusipeppa´ 'i Tonga´ 'oku fepaki ia mo e lao fakamamani lahi ki he totonu 'a e tangata´ (Article 19 of the Universal Declaration of Huma Rights).

Na'e pehee ai 'e he Palesiteni e kautaha IFJ, Christopher Warren ko e feinga ko ia 'a e Pule'anga Tonga´ ke laiseni e nusipepa´ 'oku ngaue'aki ia 'e he pule'anga Tonga´ ko ha me'a ngaue´ kenau fakafe'atungia'i 'aki 'a e tau'ataina e lea´ mo e mitia´ 'i Tonga .

"'Oku mahu'inga 'aupito 'i he temokalati´ ke tau'ataina kakato e mitia´ mo 'ene ngaue´ pea ke 'oua 'e kaunoa pe feinga e pule'anga´ ke pule'i," ko e lau ia 'a Mr Warren.

'I he tohi 'a e kautaha ni ki he Palemia´, 'Ulukalala Lavaka Ata na'a nau fokotu'u atu ai 'a 'enau ta'efiemalie lahi 'i he 'ikai ko ia ke tali e laiseni 'a e ngaahi nusipepa 'e ni'ihi ke toe hoko atu 'i Tonga . Na'a nau toe fokotu'u atu leva ki he pule'anga Tonga´ ke ta'ofi leva 'a e 'alu 'a e kau Polisi´ 'o tanaki e pepa´ mei he ngaahi falekoloa´ fakataha mo e pa'anga´.

Ko e tolu´ na'a nau fakaha ai 'a 'enau fakafepaki'i mo e ta'efiemalie ki he lao Nusipepa na'e paasi 'i he Fale alea´ pea tali 'e he Pule'anga Tonga´ 'i he ta'u kuo 'osi´.