Kei hokohoko atu pe e ngaahi ngâue hala 'i he Kasitomu´

NUKU'ALOFA: KUO ma'u 'e he Taimi 'o Tonga´ ha ngaahi fakamo'oni pepa 'oku kei hokohoko atu pe 'a e tila 'i he tute 'o e ngaahi koloa hûmai´ 'i he'enau fou mai he Potungâue Kasitomu´.

Ko e tila fakamuimui taha kuo ma'u 'e he nusipepa´ ni 'oku felâve'i ia mo ha me'alele 'a e Kautaha New Millennium Motors pea mo ha uta Koniteina kakano'i sipi 'a e Kautaha Fung Shing pea mo ha ni'ihi 'o e kau ngâue 'i he Potungâue Kasitomu´.

'I he 'aho 22 'o Fepueli 2003 ne fakangofua (approved) ai 'e ha 'Ofisa Kasitomu ko Siosaia Puakahuhua ke faka'atâ ha me'alele Mitsubishi Pajero na'e pehê tokua he'ene 'asi 'i he Foomu 'Inivoisi´ (Entry for Warehouse Ex Ship or Ex Government Warehouse) ko e môtolo 'o e 1993 ko e uta 'a e Kautaha New Millennium Motors ke tukuange kitu'a mei he Uafu Kuini Sâlote´.

Kuo fakapapau'i 'e he nusipepa´ni ko e me'alele´ni na'e 'ikai ko ha môtolo ia 'o e 1993 ka ko e môtolo ia 'o e 2003, 'a ia na'e kehe leva e ta'u na'e hâ 'i he pepa´ mei he tu'unga totonu 'o e me'alele´ ni. Ko e 'uhinga hono liliu e môtolo´ ke motu'a´ kae lava ke tute ma'ama'a ai e me'alele´.

Ko e me'alele´ni na'e uta mai mei Yokohama Siapani 'e he Kautaha Vaka Coral Islander II, folau fika 17, pea 'oku fe'unga hono mamafa´ mo e kilokalami 'e 2060. Fakatatau ki he pepa fakamatala´ ko hono mahu'inga na'e fakatau'aki mei Siapani´, na'e fe'unga mo e Yen Siapani 'e 50,000 'a ia ko e $917.43 ia 'i hono liliu Tonga´. Ko e fakafuofua 'o e pa'anga tute 'o e me'alele´ni na'e 'i he pa'anga pê nai 'e $1,000 tupu. 'A ia ko e mahu'inga 'o e me'alele´ni 'i he'ene hû kitu'a mei he uafu´ 'e ofi pê nai 'i he $3 afe´ hili hono tânaki ki ai e ngaahi fakamole kehekehe 'a e pule'anga.

Ka na'e fiha nai 'a e me'alele´ni 'i hono fakatau atu 'e he kautaha´ ni? 'I he faka'eke'eke fekau'aki mo e mahu'inga totonu na'e fakatau atu 'aki 'e he Kautaha New Millennium e me'alele´ ni, na'e pehê 'e ha taha 'o e kau ngâue 'a e kautaha´ 'oku 'ikai tenau tuku ki tu'a ha mahu'inga 'o 'enau me'alele´ ki ha taha 'e faka'eke'eke telefoni ange. Ka 'i hano fehu'i ki he Kautaha Asco Motors 'a e mahu'inga 'o e kalasi me'alele´ ni na'e pehê mei ai 'oku $78,000. Na'e toe fai foki mo ha faka'eke'eke telefoni ki he taha 'o e ngaahi pangikê 'i Tonga ni´ na'a´ ne fakatau 'a e me'alele´ ni na'e pehê mei ai na'e ofi pê he mahu'inga 'a e Kautaha Asco Motors.

Ko e me'alele hono ua´ ko ha me'alele kalasi ko e Isuzu Bighorn 'a ia na'e pehê ko e môtolo 'o e 1993 ka ko e môtolo pê ia 'o e 2003. Ko hono fika 'inivoisi´ ko e 016463. Ko e me'a natula tatau ne hoko ki he me'alele´ ni 'o hangê ko ia ne hoko ki he me'alele Pajero 'oku hâ 'i 'olunga´ ka ko e hingoa 'o e 'Ofisa Kasitomu na'e fakamo'oni 'i he pepa ngâue´ni ko A.K Bloomfield.

Kapau leva ko e me'a totonu ia na'e hoko´, 'oku mole heni 'a e pa'anga 'e lauimano 'a e pule'anga´ 'a ia na'e totonu ke fou mei hono tânaki 'o e totongi tukuhau 'o e ongo me'alele´ni pê 'e ua.

Kaekehe, 'oku 'ikai ngata pê foki 'i hono kâkaa'i 'o e ngaahi 'inivoisi ki he me'alele´ ka 'oku lahi mo e ngaahi koniteina koloa 'oku fekau'aki mo e koniteina sipi 'a e Kautaha Fung Shing, koniteina fika 'invoisi 044724. Na'e uta mai 'eni 'i he vaka Southern Cross folau fika 96 'o tau mai ki Tonga´ ni 'i he 20 Sanuali 2004 pe ofi ki ai 'i he'ene hâ 'i he 'invoisi´. Na'e fe'unga mo e kilokalami 'e 17,020 'a e sipi 'i he koniteina´ pea ne fakatau mai ia 'i he mahu'inga ko e NZ$2.20 mei Nu'usila. Ko hono mahu'inga kâtoa´ ko e $37,444.00. Hili hono tânaki ki ai e ngaahi fakamole kehekehe kau ai e totongi vaka mo e ngaahi totongi tute kehekehe 'a e pule'anga´, na'e fe'unga mo e $17,664.19 Na'e hâ foki 'i he 'iniviosi´ ni ko e tokotaha ko Angela Hill 'a e hingoa 'o e pule Kautaha Vaka, ka na'e 'ikai te ne fakamo'oni hingoa ki ai 'o kehe ia mei he angamaheni´.

'I ha fakatotolo mo ha faka'eke'eke ne hâ mai e ngaahi fakamatala ko eni´. Ko e tu'unga totonu 'o e totongi sipi 'i Nu'usila´ ko e $2.49 ki he kilo kae 'ikai ko e $2.40. Ko e taimi ko ia 'e tukuange mai ai mei he uafu´ hili hono tânaki ki ai e ngaahi tukuhau kehekehe 'a e pule'anga´ 'e a'u ki he $19,972, 'a ia leva ko e pa'anga mole 'a e pule'anga na'e totonu ke ma'u mei hono tukuhau'i 'o e koniteina´ ni ko e $2,308.05. Ko e hingoa 'o e 'Ofisa Kasitomu na'e fakamo'oni hingoa he 'inivoisi´ ni ko e hingoa ko e Saimone Tukipili.