Mavae 'a Lupepau'u pea mo Mata'i'ulua

'OKU te'eki ke a'u 'o ta'u 'e taha 'a e mali 'oku taku ko e mali lahitaha ia 'i Tonga´ kuo ma'u 'e he nusipepa ni ha fakamatala falala'anga 'o pehê kuo mâvae 'a e ongo me'a mali´, 'Eiki Salote Lupepau'u Fusitu'a mo hono hoa´, Matai'ulua 'i Fonuamotu Fusitu'a ka 'oku na nofo Siaina.

Ko e fakamatala 'oku ma'u 'e he nusipepa ni 'oku pehê kuo pau ke mavahe 'a Matai'ulua mei Beijing he 'oku 'ikai ke toe tali ia 'e he ta'ahine ke nofoange ai.

Ko 'Eiki Lupepau'u, ta'u 26, ko e 'ofefine lahi 'i he fânau 'e toko 5 'a Nôpele Tuita mo Pilinsesi Salote Pilolevu Tuita, pea ko e mokopuna lahi ia 'o e Tama Tu'i´, Taufa'ahau Tupou IV mo Kuini Halaevalu Mata'aho. 'Oku ne ngâue 'i Siaina ko e Konisela Fakalangilangi 'o Tonga 'i Siaina fakataha mo hono husepaniti´, Matai'ulua, ta'u 31.

Ka 'i he taimi na'e paaki ai 'a e pepa, na'e toki mahino, 'oku lolotonga 'i Hong Kong 'a Lupepau'u ia.

Ko Matai'ulua´, ko e foha ia 'o Nôpele Fusitu'a mo e Sekelitali Pule mo e Sekelitali ki he Kapineti, 'Eseta Fusitu'a.

Na'e fai e kâtoanga mali 'i Sune 'i Nuku'alofa 'i Sune 10, pea na'e fai ai mo e ngaahi ouau faka-Tonga kehekehe 'o e mali´ 'o a'u ki he tu'uvala´. Na'e fâ'ele'i 'e Lupepau'u 'a e ki'i ta'ahine ko Phaedra 'Anaseini Tupou Veihola 'Ikaleti Olo-'i-Fangatapu 'i Beijing 'i he 'aho 17 'o Nôvema´ 'i he hili pe ia ha mahina 'e 5 'ena mali´.