Kamata lelei ‘a Valerie

‘I he fuofua faka'ali'ali pe ‘a e fefine tolo me'amamafa tu'ukimu'a taha ‘a Nu'usila´, Valerie Adams ki he ta'u ni na'e ‘asi meiate ia ‘a e ‘amanaki lelei ki he'ene teuteu atu ko ‘eni ki he sipoti ‘Olimipiki´ he ta'u ni.

Na'e tolongi ai ‘e Valerie ‘a e Shotput ‘o ne ikuna ‘aki ‘a e mita ‘e 18.53 ‘i he faka'osinga e uike´ ‘i he fe'auhi Auckland Championship he faka'osinga e uike´.

Ko e tolo lelei taha kuo fai ‘e Valerie´ ko e mita ‘e 18.65 ‘a ia na'a ne fakahoko ‘i he fe'auhi World Champ ‘i Paris he ta'u kuo ‘osi´ ‘a ia na'a ne fika 5 ai.

Ka ko e kamata atu ‘eni e teuteu ‘a e finemui ni ki he sipoti ‘Olimipiki´ ‘a ia ‘e fakahoko ki Athens he ta'u ni. Ko ‘ene fe'auhi hoko´ ko e Australian Open pea hoko mai ai ‘a e World Indoor Champs ‘a ia ‘e fakahoko ia ‘i Ma'asi ki Hungary .