Fili'i kau Tonga ki he fuofua tau e Warriors

KUO hanga 'e he faiako 'a e timi Liiki pe 'e taha 'a Nu'usila 'oku kau ki he fe'auhi NRL 'a 'Aositelelia´, NZ Warriors 'o unuhi mai ha kau tangata fo'ou ke tesi'i 'i he'enau fuofua tau fakaangaanga kimu'a he fe'auhi e ta'u ni.

'Oku 'amanaki ke fetaulaki ai 'a e Warriors pea mo e timi 'a Illawarra he po Tu'apulelulu´. Kuo hanga ai 'e Daniel Anderson 'o unuhi hake ha kau talavou Tonga kenau kau he 'uluaki tau´. 'Oku kau ai 'a Manu Vatuvei mo 'Epalahame Lauaki 'a ia ko e ongo hu fo'ou ia ki he timi ni. Ko 'ena hu atu ko 'eni´ 'o na kau fakataha ai pea mo e kau matu'otu'a he timi´ ni hangee ko Awen Guttenbeil mo Tevita Latu.

'Oku 'i ai mo e ongo tangata ko Toshio Laiseni pea mo Cooper Vuna 'oku na kau he timi ni ka 'oku te'eki ke fakapapau'i ia 'e he nusipepa ni pe ko e ongo tangata Tonga ko aa pe 'ikai.

'Oku takitau pe he timi 'a e Warriors 'enau kapiteni´, Monty Betham pea ko e faingamalie 'eni e kau tangata Tonga´ kenau sila'i ai leva hanau tu'unga ki he 2004.