Kau 'a Lei'ataua Lôsalu 'i he timi kilikiti 'a e Vahe Vikatoliá
Fa'u 'e Tevita K. Takitaki

NUKU'ALOFA- Kuo fili'i 'a e tangata Tonga ko Lei'ataua Lôsalu mei Holonga, Tongatapu kene kau ki he timi fakavahe 'a Vikatoliá 'a ia tenau fe'auhi ki he Ipu Ensign 'i he faka'osinga 'o e uike ní.

'Oku kau foki 'eni 'i he fakalotolahi ki he Komiti Kilikiti 'a e Tonga Kotoá he ko e ola 'eni 'enau fengaue'aki vâofi mo e ngaahi kalapu kilikiti 'a 'Aositeleliá.

Na'e fakahâ foki 'e he faiako 'o e timi 'a Vikatoliá, Jodee Betheras 'oku matu'aki fakalakalaka lahi 'aupito 'a e va'inga 'a Lei'atauá pea ko hono olá kuo unuhi ia kene kau 'i he timi fakavahe 'a Vikatoliá.

'I he'enau va'inga fakakalapu 'i he uike kuo'osí 'oku kei taki pe 'a e timi 'a Vikatoliá 'i he fe'auhi fakakalapu pea 'oku 'ilonga 'a e fakalakalaka lahi 'a e va'inga 'a Lei'atauá.

'Oku 'i ai foki 'a e fiefia makehe 'a e Komiti Kilikiti 'a e Tonga Kotoá 'i he 'amapasitoa lelei 'a Lei'ataua 'i Vikatoliá pea mahalo na'a toe vave ni pe ha ava mai moha matapâ ke fetuku ange 'a e kau va'inga lelei mei Tonga ni.

Kaekehe 'oku hangê 'eni ha fakalotolahi ki he toenga 'o e kau va'inga 'i Tonga ni kenau va'inga fakamaatoato mo lelei he 'oku ha'u pe 'a e tâpuakí 'i he taimi kotoa pe 'o 'ikai tete 'ilo kiai.