Toe foki mai e timi Marist Tonga´ ki Aotearoa´ ni
Fa'u 'e 'Ulu'alo Po'uhila

Kuo fili'i 'a e senitâ va'inga fakaholomamata 'a e timi 'akapulu 'a e Marist Tongá, Tevita Tu'amoheloa ke ne kapiteni mo takitau 'i he timí 'i he'enau folau mai ki Nu'usila ni ki he fe'auhi 'a e ngaahi kalapu Marist 'o Nu'usilá 'a ia 'oku fakahoko ki Uelingatoní.

Na'e tu'uta mai 'a e timi´ 'i he 'aho Tusité 'a ia 'oku kau ki he timi´ ha kau va'inga 'e toko 27 mo e kau 'ofisiale 'e toko 7.

'Oku pule he timí 'a Viliami Falekâono pea tokoni 'a Malietau Hopoi; fai fakamalohisinó ko Tomasi Lauaki; fai fotofotá, 'Etimoni Vaihû; faiako 'a Soane Vainikolo pea tokoni 'a Sosefo Tangitau pea kau ki ai mo 'Isamu Taukapo.

Ko e 'a'ahi mai ko ia 'a e Marist ke kau ki he fe'auhi toko 7 'a e Marist 'a Uelingatoni´ he Tokonaki´. Ka 'oku ha'u tokolahi e timi´ he 'e hili e fe'auhi ko ia´ 'e hoko mai ai pe e timi´ 'o tau mo e ngaahi timi Marist kehekehe 'i Nu'usila ni 'i he fe'auhi toko 15 ia.

Lolotonga 'enau 'i he vahe Uelingatoni´ tenau tau ai mo e ngaahi kalapu Marist 'a Palmerston North, Hutt Valley , St Patrick Marist pea tenau toki tatuku'aki ha tau mo e timi Marist fakatahataha 'a e vahe Uelingatoni´.

'E hili ia´ 'e foki mai leva e timi´'o tau mo e timi Marist 'a Rotorua´ pea toki tatuku mai ki 'Okalani 'o na tau ai mo e timi Marist 'a Manukau.

Fakatatau ki he fakamatala 'oku ma'u 'e he nusipepa ni ko e ha'u ko 'eni 'a e timi´ 'oku fai 'enau fetu'utaki mo e fakafalala´ ki he Kolisi tutuku 'Apifo'ou 'o 'Okalani´ kenau alea'i e nofo'anga´ pea mo hono tauhi e timi´. Ko e pango he ne tu'uta mai e timi´ ia he 'aho Tusite´ ki Nu'usila ni 'oku 'ikai hano talitali pea ne iku heka pasi ta'ekai ai pe e timi´ ki Uelingatoni he pongipongi tatau. Ne fai e feinga ki he Komiti Kolisi tutuku 'Apifo'ou 'i 'Okalani´ pe ko e ha e me'a ne hoko´ ka ne 'ikai ke ma'u ha taha ia.

Kaekehe fakatatau ki he fakamatala mei he timi´ ko e 'uhinga lahi 'enau toutou folau mai ko 'eni´ ke fakamaketi'i atu ai pe 'enau kau va'inga´ telia na'a ma'u ai ha faingamalie va'inga ha tamaiki 'i Nu'usila ni.

'I he taimi tatau 'oku lolotonga teuteu atu e timi Marist 'a 'Eua´ kenau folau atu ki Ha'amoa 'o fakafofonga'i 'a e Marist Tonga´ 'i he fe'aiuhi toko 7 'a e Marist 'a Ha'amoa´.

Ko e kalapu 'akapulu Marist ne toki fokotu'u pe 'i Tonga ka 'oku mahino 'a e faipoupoua mo pule'i lelei e kalapu ni. Na'a nau tua mai ki Nu'usila ni he konga kimui e ta'u kuo 'osi´ pea kuo nau a'u ki he tu'unga alea'i e tau fakakalapu 'a Tonga´ pea pehee ki he fe'auhi 'a Lavengamalie´. Ko e kalapu ni 'oku meimei ko e fanau va'inga pe ia na'a nau va'inga fakaako he Kolisi 'Apifo'ou´ ka 'oku nau fakatahataha mai 'o fa'u e kalapu ni.

'Oku 'i ai e ni'ihi 'iate kinautolu kuo nau foki atu ki he'enau ngaahi timi fakakolo´ 'o va'inga mei ai ka na'a nau 'i 'Apifo'ou mo e Marist. 'Oku kau heni 'a Simi Motu'apuaka ka kuo ne hiki atu ki he timi 'a e Fuekafa´ 'o va'inga mei ai.