Ikuna 'e Taunisila fe'auhi tâpulu 'a e U16 'a Fisí
Fa'u 'e Tevita K. Takitaki

NUKU'ALOFA : Na'e ikuna fakakâtoa 'e Pila Taunisila 'o Tonga ni 'a e fe'auhi tâpulu 'a e fânau si'i hifo 'i he ta'u 16 'i he fe'auhi 'a e kautaha hu'akau Rewa Dairy 'a ia na'e fakahoko ki Fisi 'i he 'aho 14 'o Sanualí.

'I he fe'auhi 'a e ngaahi timi si'i hifo 'i he ta'u 18 na'e fika ua ai 'a David Wyler Junior 'i he lau poini fakalûkufua 'aki 'a e poini 'e 332 pea kia Lupe Tupou mo Niti Taunisila na'a na kau pe 'i he kau tu'ukimu'a 'i he fe'auhí.

Ko e toko 97 na'a kau ki he fe'auhi ni pea 'oku kau 'a e fe'auhi ko 'eni 'i he lahi taha 'i he Pasifikí 'a ia 'oku kamata pe mei he si'i hifo 'i he ta'u 12 'o 'alu ai ki he ta'u 21.

'I he taimi tatau 'oku mahino 'a e mahu'inga'ia 'a e kakaí 'o e Pasifikí 'i he va'inga tâpulú 'a ia na'e hâ ia 'i he fe'auhí 'a ia ko e si'isi'i taha 'i he fe'auhi ni ko e ki'i tamasi'i ta'u 6 mei Fisi.

Na'e kau fakataha atu ki he fe'auhí 'a Tonga ni, Niu Kaletonia, Nu'usila mo Fisi pea ko e tokolahi taha 'o e kau ikuná na'e ma'u pe ia 'e he ngaahi kalapu 'a Fisí.

Na'e fakahâ 'a e Pule 'o e kau folaú, 'Elina Maka Raass na'e matu'aki ola lelei 'aupito 'a e va'inga 'a e fânaú ka 'i he taimi tatau na'a nau ako 'a e me'a lahi lolotonga 'a e fe'auhi ni.

Neongo ko e fuofua ta'u 'eni 'o Pila 'i he fe'auhí ka na'e matu'aki mahino 'a e kalasi kehe atu 'a 'ene va'ingá 'one ikuna'i ai 'a e pale ki he lelei taha 'i he fe'auhi 'a e U16.

'' Kuopau ke foki 'a Pila 'i he ta'u kaha'u ke malu'i hono tu'ungá he neongo 'a 'ene toki kau pe 'i he ta'u ni ki he fe'auhí ka 'oku fu'u lelei 'aupito 'a e tu'unga kuo ne a'usiá'', ko e lau ia 'a 'Eliná.

Na'e fakahâ 'e Pila ki he ongoongo sipoti 'a e nusipepa ni 'oku ne ongo'i fiefia 'i he ikuna na'a ne faí ka na'a ne mahu'inga'ia ange 'i he'ene fetaulaki mo e kau tu'ukimu'a mei he Pasifikí 'i he tâpulú 'o lava kenau fevahevahe'aki.

'' Na'aku ongo'i fiefia 'i he fuofua taimi keu kau ai ki he fe'auhi ni pea ko hono olá 'oku fakafiefia ka na'a ku ako 'a e me'a lahi 'i he folau ko 'ení fekau'aki mo e tâpulú'', ko e lau ia 'a Pila.

Na'a ne fakalotolahi foki ki hono kaungâ va'ingá pea pehê ki he fânau 'oku nau manako ki he va'inga tâpulú ke 'oua tenau fo'i vave kanau feinga kenau poto 'i he sipoti ni he 'oku kau 'eni 'i he sipoti pa'anga lahi taha 'i mamaní.

'Oku kau 'eni 'i ha ola matu'aki ma'olunga 'aupito pea neongo 'a e tokosi'i 'a e timi 'a Tonga ka na'a nau a'usia ha tu'unga ma'olunga 'aupito.

Kaekehe na'e toe pehê foki 'Eliná na'a nau toki fakatokanga'i ta 'oku ngâue kotoa 'aki pe 'a e 'u paté 'i he taimi 'oku te tâ ai ka 'i Tonga ni ko e pate pe 'e ni'ihi 'oku nau ngâue'akí pea tuku 'a e ni'ihi.

'' Mahalo ko e me'a mahu'inga taha ia 'i he'emau folaú ke siofi 'e he fânaú ta 'oku 'i ai pe 'a e feitu'u mo hono pate ke tâa'i'aki'', ko e fakahâ ia 'e 'Eliná.

'Oku faka'amu foki 'a 'Elina ke 'i ai ha taimi lahi 'o e kau va'inga ko 'ení 'i he mala'e tâpulú ka ko e tupu mei he'enau kei akó pea 'oku 'ikai leva ke a'u 'a e tu]unga na'e totonu ke nau a'u kiai.

Na'a ne toe pehê foki 'oku lahi mama'o 'a e fu'u mala'e tâpulu ia 'a Fis´^'i hono fakahoa ki Tonga ni pea ko e taha ia 'a e ngaahi palopalema na'e fekuki mo e fânaú lolotonga 'enau folaú.

Na'e kau mai foki 'a Nu'usila ki he fe'auhi ko 'eni fakataha mo Niu Kaletoniá pea ko e toenga 'o e kau fe'auhi ko e kau Fisi pe.

Na'e kamata 'a e fe'auhi ko 'eni 'i he 1998 pea na'e kau 'a Tonga ni 'i he ngaahi fonua na'a nau kau ki he fe'auhi ni.