|
Toitoi 'a Wong he Tu'i´
Lau 'a e 'Etita´:
'Oku ngali kehe mo fakafehu'ia lahi hono fetuku mai 'e Dr Wong e kakai tokolahi he taimi kehekehe ke nau ngâue'i hono hôtele´ kae 'ikai ke ne 'omai ha naunau ngâue ke fai mo langa ke 'osi. Ko e fehu'i´, kapau 'oku 'ikai ha naunau langa pe ko ha pa'anga ko e hâ 'oku uta mai ai e kau ngâue muli´? Pea kapau 'oku milionea 'a Dr Wong, ko e hâ 'oku 'ikai fai mo langa ai e hôtele´ ke 'osi´? 'Oku loto nai ke 'osi hono langa´ pe 'oku 'uhinga 'a hono tukutuku'i ta'e'osi kae fetuku mai e kau langa´?
'Oku fakatupu fifili e fakahâ 'e he kau ngâue´ 'oku 'ave 'enau paasipooti´ mo e tukuaki'i ne fakahâ ange ka 'osi ha ta'u 'e tolu 'enau 'i heni´ 'e 'oange 'enau Paasipooti Tonga 'e he Tu'i´. Pea 'oku hangê 'oku toho mo tautautoli e langa´ kae lava hanau taimi lôlôa 'i Tonga . 'Oku 'asi mai e lanu 'o e fetuku kakai fakavaha'apule'anga´ 'i he fo'i polôseki ko eni´. Kapau 'oku nofo e kau ngâue´ heni kae 'ave 'enau paasipooti´. 'Oku 'i fê ia? 'E lava noa pê ke ngâue'aki 'enau paasipooti fakalao ko ia´ ke fetuku'aki ha kakai kehekehe 'i mâmani kae nofo e kakai totonu´ ia 'i Tonga . Kapau 'e ma'u paasipooti Tonga 'a e ni'ihi ko eni´ 'o hangê ko e tukuaki'i kuo nau fai´, 'e 'i fê 'enau paasipooti motu'a´? Na'e toki hopo´ ni 'a e matâpule Tonga ko 'ene kaiha'asi e kakai Tonga´ ki Hauai'i. Na'e tû'uta e tokotaha ko eni´ mo e ngaahi paasipooti ki Tonga , ka ne 'ikai ha'u ai ha taha. Tâ leva 'i mala'evakapuna he 'û paasipooti´ tokua ne tû'uta mai e kakai ai. Pea toki heka leva e kakai kehe ia 'i Tonga´ ni he 'û paasipooti ko ia´ ke foki ki Hauai'i. Ko e me'a ia 'oku hoko.
Ko e me'a pê eni 'oku hâ fakamaatoato mei he langa 'a Wong. 'Oku le'ohi sekulitî pea tapu 'aupito ke tu'unoa ha taha ai. Hâ e 'uhinga? Hoko pê ki ai´, 'oku lahi e kakai muli 'oku fetuku mai ke nau ngâue ai´ mo nofo mai ki Tonga´ ni ka 'oku 'ikai 'aupito ha fakalaka ia 'e 'asi mai ki tu'a. 'Oku 'i ai e ngaahi me'a 'oku pulia fekau'aki mo e langa´ ni pea ko e me'a ia 'a e Va'a Fakatotolo Makehe´ ke nau fakatotolo'i kae tuku â e tu'u holo he tu'afale 'o e kakai 'oku tui ki he Temo´. Ko e pango´ he ko e Minisitâ Polisi´ mo Dr Wong 'oku na fakatou 'i he malumalu 'o e Tu'i´ pea 'e 'ikai tau'atâina ha ngâue ia 'e fai kia Dr Wong. 'Oku toe paasipooti fakatikilômetika foki 'a Wong ia.
|
