|
Ngâue ki hono fakalelei 'o e kalia Milêniume 'a Tonga´
Fa'u 'e Tevita K. Takitaki
'Oku mahu'inga ke tauhi 'a e ngaahi koloa mo e 'ulungaanga tuku fakaholo 'o e fonua ni 'o hangê koia na'e 'iloa ai 'a Tonga ni he kuohilí 'i he folau kaliá.
Ko e taumu'a ia 'oku poupou'i 'e Mark Belvedere mo Sitiveni Fehoko 'a ia ko kinaua kuo tuku kia kinaua 'a e kaliá kena fakalelei'i.
Ko e vaka lahi taha 'eni 'i mamani kuo 'i he fotunga 'o e kaliá 'a ia ko hono loloá 'oku fute 'e 105.
Na'e kamata he ta'u ni hono monomono 'o e kaliá 'o kau fakataha kiai 'a Mark mo hono hoa ngâue 'i Tonga ni ko Sitiveni ke fakafoki 'a e kaliá ki hono tu'unga totonú.
Na'e fakahâ 'e Sitivení 'oku lahi 'aupito 'a e ngâue 'oku fai ki he fakalelei ko 'eni 'o e kaliá ka na'e mei vave no nounou ange hano toe fo'u ha kalia fo'ou.
'' 'Oku ou tui 'oku 'i he peseti 'e 85 'a e fakalelei 'oku fai ki he kaliá pea 'oku lolotonga fai 'a e ngâue he taimi ni ke fakatolonga 'a e vaká 'aki 'a e vanisi ke tolonga ange 'o 'oua 'e popo vave''. ko e fakahâ ia 'e Sitivení.
'Oku kau foki kiai mo hono vete 'o e kafá kae ngaue'aki 'a e fa'ahinga 'o e tuainé 'a ia 'oku toe tolonga ange ia 'i he kafá.
'' Kuo tau a'u ki he kuonga 'o e 'ilo kehekehe mo e fakalakalaka pea ko e ha katau toe sio kehe ai mei he ngaahi naunau faka'ofo'ofa mo tolonga koia'', ko e lau ia 'e Sitivení.
Na'e toe pehê foki 'e Sitiveni 'oku toe fakatakele fo'ou kotoa 'a e vaká pea ko e palopalema lahi 'oku nau fekuki moia ko e feinga'i ha 'akau lelei ke fakahoko'aki 'a e ngâué.
'Oku 'omai foki 'a e 'akau ko 'eni mei 'Eua ka ko e 'akau ki mu'a na'e fai 'aki 'a e ngaue´ na'e 'omi ia mei Fisi 'e Tu'ione Pulotú.
'I he lava 'a e ngâue ki he kaliá kuo 'i ai 'a e fokotu'utu'u 'a e ongo tangata ni ke 'ave 'a e vaká ki muli 'o ngâue ai 'a ia kuo 'osi mâau 'a e taulanga 'i Maui, Hauai'i.
'Oku kau ai 'a 'ena fokotu'utu'u ke ngaue'aki 'a e kaliá ki he ngaahi polokalama fakaako mo e ngaahi me'a faka folau'eve'evá.
Neongo 'e ma'u ai 'a e ngaahi me'a lelei mei he kâliá ka koe aleapau ko e 'osi pe pea 'e fakafoki mai ki Tonga ni he ko e koloa ia 'a e pule'angá.
'Oku fe'unga 'a e fakamole ki he ngâue ni mo e $270,000.
|
