|
Tali 'Uliti ki he Pule e TV Tonga´
fa'u 'e Mâteni Tapueluelu
KUO 'oatu 'e he Pule 'o e Polokalama TV, "Fofola e Fala´ Kae Alea e Kâinga´," 'Uliti Uata, ha'ane tali 'o tukuaki'i mamafa e Pule Lahi 'o e TV mo e Lêtiô Tonga´ , 'Elenoa 'Amanaki, koe'uhi´ ko 'ene ta'ofi 'ene polokalama TV na'e 'amanaki ke tukuange 'i he pô Tûsite 27 'o e mâhina kuo 'osi´.
Na'e 'osi paaki atu 'e he nusipepa´ ni he uike kuo 'osi´ 'a e tohi ta'ofi 'o e polokalama´ ne fai 'e 'Elenoa´, 'a ia na'a´ ne pehê 'oku 'ikai ha fakamo'oni ki he ngaah tukuaki'i ne fai 'e he polokama´ ni ki he pule'anga´ kau ai e ngaahi ngâue hala mo e kâkâ 'i he Potungâue Kasitomu´, tukuaki'i 'o e 'Amapasitoa 'Amelika´ pea toe fakapalataha foki.
Ko e polokalama´ ni ne kau atu ki ai 'a 'Akilisi Pôhiva, Feleti Sevele mo 'Uliti Uata pea ne nau lave ai ki he ngaahi me'a kehekehe pê pea nau toe fakama'ala'ala foki e tûkunga 'oku 'i ai e teu hopo'i 'o e liliu Konisitûtone ne fai 'e he pule'anga´. Ne pehê ai 'e 'Uliti kuo hangê 'a e TV ha fakamaau'anga´.
"1. Ko e fakamo'oni pau pe fakamo'oni fakahâhâ ko fale hopo pê 'oku fai ai e founga ko ia´ pea 'oku polokalama e pule'anga´, 'Ofisi Palêmia´, Clive Edwards, 'Ofisi Lao´, 'Eseta Fusitu'a, 'oku 'ikai te mou 'oatu ha taha mei he'emau tafa'aki´ ke tali ki ai.
"2. Ko e fakamatala ki he US Ambassador, ko 'emau to'o hangatonu mei he Press Release 'a e Ambassador pea na'e 'oange 'a e tatau 'e taha kia Laumanu. Na'e 'ikai ke mau tukuaki'i ia.
"3. Ko e ngaahi tukuaki'i 'o e Potungâue Tukuhau´ 'e Feleti mo 'Akilisi´, 'oku 'i ai e ni'ihi 'oku 'ave 'e he potungâue´ ki he fakamaau'anga´ 'i he ngaahi issue ko ia´ pea na'e 'ohake 'i Fale Alea pea 'oku hâ 'i he miniti 'o e Fale Alea´.
"4. Ko e hâ 'oku ta'epalanisi ai 'emau polokalama´ kae palanisi e polokalama 'a e pule'anga´ na'e fa'a fai 'e Clive Edwrads mo ha ni'ihi,... 'Eseta Fusitu'a.
"5. 'E toki kamata 'i Fepuli 2004 e ngâue ki he lao fo'ou´ ki he Media ka kuo´ ke ta'ofi 'e koe 'emau polokalama´ 'i Sanuali´."
Na'e pehê foki 'e 'Uliti´ na'a nau hiki e polokalama´ pea mo e faiongoongo 'a e TV Tonga´, Laumanu Petelô, koe'uhi´ ke fakapapau'i 'oku tô 'i loto tu'utu'uni 'a 'enau polokalama´ pea´ ne fakahoko ange 'e tukuange 'a e polokalama´ 'i he 9:00 he pô ko ia´ ka ne ta'ofi ia 'e 'Elenoa.
Pea lolotonga e tukuaki'i 'e 'Elenoa 'oku fakapalataha e polokalama "Fofola e Fala´", ko e hia tatau ia ne tukuaki'i ki ai 'e 'Uliti 'i he ta'ofi kuo´ ne fai´.
"'Oku ou tukuaki'i mamafa koe 'oku fai fakapalataha mo filifilimânako e fakahoko ho fatongia´."
'Oku lolotonga ta'ofi foki 'e he pule'anga´ hano toe tufa ha nusipepa 'i Tonga talu mei he kamata'anga 'o e ta'u ni´. Kuo kamata foki e ngaahi kemipeini mo e polokalama mîtia 'a e kau tui ki he Temokâlati´ mo e Kotoa Movement, pea 'oku faingamâlie 'a e tafa'aki e pule'anga´ 'i he TV OBN mo e TV Tonga´ kae 'ikai lava ke 'asi e le'o 'o e kau Temokâlati´.
|
