|
Ta'ofi 'e he TV Tonga´ polokama Fofola e Fala
fa'u 'e Mâteni Tapueluelu
NUKU'ALOFA: NA'E ta'ofi 'e he Pule Lahi 'o e TV Tonga´, 'Elenoa 'Amanaki, 'a e Polokalama "Fofola e Fala´ kae Alea 'a e Kâinga´", 'a ia ne 'amanaki ke fakamafola he efiafi Tûsite 'o e uike kuo 'osi´. Ko e polokalama eni 'a e Fakafofonga Fika 2 Kakai 'o Ha'apai´, 'Uliti Uata, 'oku fa'a fakamafola mei he TV tatau.
'I ha tohi 'a 'Elenoa kia 'Uliti he 'aho Tu'apulelulu´, na'a´ ne fakahâ ai ha ngaahi 'uhinga 'e 4 na'e ta'ofi ai e polokalama´.
"1. Ngaahi lau mo e tukuaki'i ki he Pule'anga Tonga´, 'oku 'ikai hano ngaahi fakamo'oni pau pê te mou 'omai ha taha mei he pule'anga´ ke tali ki ai,
"2. Ngaahi fakamatala mo e tukuaki'i ne fai ki he US Ambassodor 'o 'ikai hano le'o ke ne fakamo'oni mo tali ki ai,
"3. Ngaahi lau mo e tukuaki'i 'o e Potungâue Tukuhau´ mo e ngaahi potungâue 'a e Minisitâ Pa'anga´, kae 'ikai hanau le'o ke nau tali mai ki ai.
"4. 'Oku ta'epalanisi mo fakapalataha mo tukuaki'i hala mo ta'e 'i ai ha fakamo'oni pau ho'omou ngaahi tâlanga na'e fai´ pea 'i he lao fakangâue´ pea pehê ki he Lao Fakamafolalea´, Communication Act, 'oku tapui ai hano fakamafola ha polokalama 'oku natula pehe´ ni. Kuo pau ke palanisi 'a e ongo tafa'aki´ ke ma'u 'a e totonu mo fair 'a e tâlanga´."
Ko e polokalama eni ne fakahâ ai 'e 'Uliti Uata mo 'Akilisi Pôhiva 'a e puipuitu'a ki he teu hopo'i 'o e pule'anga´ ki he liliu e Konisitûtone´ mo e ngaahi 'isiu kehe fekau'aki mo e potungaue Kasitomu 'a Tonga´ mo hono fakahâ 'e he 'Amapasitoa 'a 'Amelika ki Tonga´ 'oku 'ikai ke nau sai'ia 'i hono liliu 'e Tonga e kupu 7 'o e Konisitûtone´.
'E toki paaki atu e tali 'a 'Uliti ki he tohi´ ni, ka na'a´ ne pehê, ko e polokalama´ ko 'enau vakai´ ne fai ia 'o makatu'unga he ngaahi me'a ne hoko (opinion), pea ne totonu ke tukuange pê ia.
"Ko e fakamaau'anga´ pê 'e taha 'oku´ te 'alu ki ai mo e fakamo'oni ki he fo'i na'e mo e 'oku te te lea 'aki´. Ka 'ikai, 'e 'ikai toe malava e kakai´ ke tâlanga 'aki honau loto´ mo 'enau tui´. Na'e toe hâ 'a 'Eseta Fusitu'a mo e Minisitâ Polisi´ he TV tatau 'o fakahoko ha ngaahi lau mo e tukuaki'i fefeka 'o e ni'ihi e kau temokâlati´. Na'e 'ikai ke mau 'i ai ke tali. Ko e ta'ofi ko eni´ 'oku lanu fakapolitikale 'aupito pea ko e fakamelomelo kovi ia 'a hono pule'i 'e he pule'anga´ 'a e mîtiaa´."
|
