|
Talitali e kau folau'eve'eva e Europa
Fa'u 'e Taina Kami Enoka
Na'e fakahoko ha talitali 'a e kau folau'eve'eva 'a e vakameili ko MS Europa 'i he holo 'a e Kolisi Kuini Sâlote 'i he 'aho Falaite. Ko e kau folau'eve'eva 'e toko 200 tupu na'e 'i he holo, pea nau mamata tonu ki he ngaahi tau'olunga fakaTonga mo e ngaahi fonua, fanongo he ifi 'a e kolisi, pea 'ahi'ahi'i e niu mata mo e 'ilo ho'atâ.
Fakatatau ki he fakmatala 'a e Konisela Fakalangilangi 'o Siamane ki Tonga, Karl Sanft ki he Taimi 'o Tonga, na'e 'i ai 'a e ongo'i fiefia makehe 'a e kau folau'eve'eva, 'i he'enau mamata tonu 'i ha taha mei he Fale 'o e Tu'i, Eiki Titilupe Fanetupouvava'u Tuita, 'a ia na'a ne me'a 'i he kâtoanga.
Na'e fai e lulu 'i he vaka, pea ko e ngaahi hingoa 'e toko 50 na'e toho, pea ko kinautolu pe na'a nau lava 'o fe'iloaki mo ia. 'I he lau 'a Karl, na'e loto pe 'a e kapiteni mo e kau ngâue na'a nau 'i he vaka 'i he'enau 'a'ahi fakamuimui mai ki Tonga ni, ke ô mai ki Kolisi
Fefine, pea na'e ma'u ai 'a e me'a'ofa 'a e Kolisi fe'unga mo T$8000.
Na'e fakahoko ange 'a 'Eiki Fanetupouvava'u 'a e hâ'ele 'a e Tama Tu'i´ mo e Kuini´ ki 'Amelika, mo fakahoko atu 'a 'ena talamonû mo 'ena fiekaungâfiefia 'i he'enau 'a'ahi ki Tonga ni.
Felâve'i mo e ngaahi fakame'ite, " 'oku ou fakatauange, te mou mâlie'ia ai, pea ke hoko ia ko ha me'a ke mou toe fie 'a'ahi mai ai ki he 'Otu-Motu-Anga'ofa 'i he kaha'u na," ko 'ene me'a ia. Na'e mavahe ki Nu'usila 'a e vaka meili´ ni 'i he 5 'i he 'efiafi Falaite.
|
