Faiako 'a Michael Jones kae tokoni 'a Willie 'O 'i he timi 'a e Pasifikí
Fa'u 'e Tevita K. Takitaki

NUKU'ALOFA- Kuo fili'i 'e he Poate 'Akapulu 'a e Pasifikí 'a Michael Jones ke ne hoko ko e faiako 'o e timi filifili 'a e Pasifikí pea tokoni 'a Willie 'Ofahêngâue fakataha mo e faiako 'a Fisí.

'I he taimi tatau kuo mahino 'e fetaulaki e timi 'a e Pasifikí mo e Wallabies 'i he 'aho 3 'o Siulaí pea toki tesi faka'osi mo e All Blacks 'i he 'aho 10 'o e mahina tatau.

'Oku kei fai mo e ngâue ke kau 'a e timi 'a e Pasifikí 'i he fe'auhi Super 12 'o e ta'u ni 'a ia ko e ola ia 'o e fakataha na'e kau atu kiai 'a Sakopo Lolohea, Pule 'o e Poate 'Akapulu 'a Tongá 'i he uike kuo'osí 'i 'Aokalani, Nu'usila.

Koha 'epoki fo'ou 'eni kuo a'usia 'e he ngaahi fonua 'o e Pasifikí ka 'i he taimi tatau 'oku totonu ke nau leleaki'i 'a e faingamâlie koia ke a'u ki he tumutumú.

'Oku lahi hono poupou'i 'o e fokotu'u fo'ou ko 'ení ka 'i he taumu'a 'a e Poate 'Akapulu 'a Mamaní ke 'i ha tu'unga ma'olunga 'aupito 'a e va'inga 'a e timi 'a e Pasifikí.

'Oku ngali faingata'a hano feinga'i 'o e kau va'ingá kenau feangai fakaêva'inga ka 'okapau 'oku nau loto'aki pea 'oku hâ ngali faingofua 'a e me'a kotoa.

Kuo mahino foki mo e fokotu'utu'u ki he tau filifili 'o e timí ni 'a ia 'e fili ia lolotonga 'a e va'inga tapatolu 'a Fisi, Ha'amoa mo Tonga ni 'a ia 'oku kamata 'i Mê 'aho 29.

'E fetaulaki 'a Tonga mo Ha'amoa 'i he 'aho 29 'o Mê , Tonga mo Fisi 'i he 'aho 5 'o Sune pea toki fetaulaki 'a Fisi mo Ha'amoa 'i he 'aho 10.

Hili hono fili 'o e timí pea tenau kemi 'i he 'aho 14-24 'o Sune kimu'a pea nau toki fetaulaki mo e timi 'a Niu Sauele 'i he 'aho 28 'o Sune.

Tenau hoko atu ai ki he tau mo e timi 'a Kuinisilani pe ko e Brumbies 'i he 'aho 30 ki mu'a pea nau toki tesi mo e Wallabies 'i he 'aho 3 'o Siulaí.

Tenau fakahoko mo e va'inga 'e taha mo e Vahe Provincial 'a Nu'usila 'i he 'aho 7 kimu'a pea nau toki tesi 'i he 'aho 10 mo e All Blacks.

Na'e fakahâ foki 'e Sakopo Lolohea 'oku poupou'i lahi 'aupito 'e he Poate 'Akapulu 'a Mamaní 'a e fokotu'utu'u fo'ou ko 'ení pea 'ikai ngata ai ka 'oku fiema'u 'e he kau fakafofonga mei he timi 'a e Pasifikí ke fai ha lau pau fekau'aki mo e tamaiki va'inga koia 'oku nau fakafofonga'i 'a e ngaahi fonua kehe.

'' Kuo pau keke va'inga 'i he fe'auhi tapatolú kae mahino hao sea ki he timi 'a e Pasifikí pea kapau he'ikai teke va'inga 'i he fe'auhi ni pea 'oku 'ikai hao sea 'ou ki he timi 'a e Pasifikí'', ko e fakamâ'ala'ala ia 'a Sakopó.

Na'e toe pehê foki 'e Sakopo 'oku fiema'u 'e he ngaahi fonua 'o e Pasifikí ke foki 'enau kau lelei taha 'o va'inga ma'a kinautolu 'i he fe'auhi tapatolú kae malava ke ma'u ha timi lelei ki he ngaahi fe'auhi 'e kau kiai 'a e timi 'a e Pasifikí.

'' Kapau 'e ola lelei 'a e fo'i nga'unu ko 'ení pea ko e hâ 'e toe 'alu ai 'etau kau va'inga leleí ki mulí'', ko e lau ia 'a Sakopo.

Na'e toe pehê 'e Sakopo kuo fakaafe'i 'e Ha'amoa ke fai ha fakataha lahi kia kinautolu 'i Ma'asi pea ko e me'a mahu'inga taha 'i he fakataha ko 'eni ko e alea'i 'a e fo'i lao koia ki hono fakafaingata'a'ia'i 'o e tamaiki va'inga mei he Pasifikí 'oku nau va'inga 'i he ngaahi fonua kehé.

Kaekehe kuo kamata ke lele 'i matangi 'a e fokotu'utu'u 'oku fai ki he timi 'a e Pasifikí pea koha sitepu ma'olunga 'eni kuo a'usia 'e he timi ni pea 'oku totonu ke fai honau lelei tahá he ko e faingamâlié 'e foki pe kia kinautolu kau va'ingá.

Kuo mahino kuo tali mo e kole 'a e ngaahi fonua ni ke toloi 'a e va'inga ke kualifai ki he tau'i 'o e Ipu 'a Mamani ki he 2007 ke toki fakahoko 'i he ta'u kaha'u he 'oku nau femo'uêkina 'i he alelea ki he timi 'a e Pasifikí.