Milimilisino 'a Ti'o mo Soane mo e kau tu'ukimu'a he volipolo matatahi´
Fa'u 'e 'Ulu'alo Po'uhila

'OKU lolotonga 'i Aotearoa ni 'a e ongo tangata hau 'o Tonga he fe'auhi volipolo matatahi´, Ti'o Fonohema mo Soane Vaipulu ke na kau atu ki he fe'auhi volipolo matatahi 'a e MORE FM.

Ko e ongo tangata ni foki na'a na ma'u e metali siliva 'i he fe'auhi volipolo matatahi 'a e sipoti 'a e Pasifiki Saute´ he ta'u kuo'osi´.

Pea ko 'eni kuo manga mai e ongo tangata ni 'o fe'auhi holo 'i Nu'usila ni tupu pe ia mei he mahino mai 'oku 'ikai ke fu'u lahi e fe'auhi volipolo matatahi´ 'i Tonga . Ko ia 'oku pau ai kena takai holo 'i muli o kau he ngaahi fe'auhi ko ia´ ke fakatupulekina ai pe 'ena taukei´.

'I he faka'osinga e uike kuo 'osi´ na'a na kau atu ai ki he fe'auhi 'i Mt Maunganui poea neongo ne 'ikai ke na ikuna e fe'auhi´ ni ka 'oku hoko ia ko e ako lahi kiate kinaua.

'I he fe'auhi ko 'eni 'a e MORE FM 'oku kau mai ki ai e kau tu'ukimu'a 'i mamani. 'Oku kau ai e hau 'o Siamane´, Andy Scheverpflug mo Christoph Dieckmann 'a ia ko kinaua 'oku fika 12 he fakahokohoko 'a mamani´. Ko kinaua na'a na ikuna'i e fe'auhi Mt Maunganui he uike kuo 'osi´.

'I he fe'auhi ko ia 'i Mt Maunganui´ na'e faka'ohovale'i ai 'e Ti'o mo Soane e kau mamata´ 'i he'ena vevela'i e ongo tangata ne na lava mai mei 'Amelika´ 'a ia ko Guy Hamilton mo AJ Mihalic. Na'e fika 7 ai 'a e ongo tangata ni he fe'auhi ni.

'I he uike kuo 'osi´ ai pe na'a na kau atu ai ki ha fe'auhi volipolo matatahi Ohope 'i Whakatane 'i he 'aho Pulelulu´ mo e Tu'apulelulu´.

Kaekehe ko e fe'auhi 'a e MORE FM 'oku kau mai ki ai e kau fakafofonga mei 'Aositelelia, Nu'usila mo e fe fua ka ko Tonga pe mo Ha'amoa mei he ngahai motu iiki e Pasifiki´ 'oku kau mai ki he fe'auhi ni.

Ko e fe'auhi ko 'eni´ (MORE FM) 'oku 'ikai ke fai ia ki ha matatahi ka kuo hanga 'e he kau fokotu'utu'u e fe'auhi 'o ngaohi e fu'u mala'e va'inga tenisi ASB 'i 'Okalani´ ke hangee pe ha fu'u matatahi ke fai ai fe'auhi´.