Fefekaange ngaue kau Polisi´ ki laiseni faka‘uli´

‘OKALANI : KOE'UHI´ ko e lahitaha e ngaahi fakatu'utamaki he hala pule'anga´ ‘i Nu'usila ni ko e to'utupu ‘oku nau kei ma'u laiseni akoako´, kuo fakaha ai ‘e he potungaue Polisi´ kuopau ke nau toe fakafefekaange hono kumi mo ta'ofi ‘o sivi e kau faka'uli´ mo ‘enau lasieni´.

‘I he hengihengi Pulelulu ‘o e uike´ ni na'e maloloo ai ha to'utupu ‘e toko 4 ‘i ha fakatu'utamaki ‘i he fetaulaki'anga e hala Te Irirangi mo e Accent Drive ‘i Manukau´. Ko e fanau ni ‘oku nau kei ta'u uofulu tupu si'i pea ne te'eki ke tuku mai

‘e he kau Polisi´ ha fakaikiiki ki he laiseni ‘a e faka'uli´ ka ‘oku mahino ne lele lahi e kaa´ ni ‘o tui'i e fu'u pou'uhila ‘o ta'e'oanga ‘aupito pea ‘ikai ke mate kotoa ai e toko 4 ne ‘i loto´.

Koe'uhi´ ko e fu'u lahi e fakatu'utamaki ni na'e pau ai ke tu'utu'u e kaa ‘aki ha ngaahi fu'u misini tutu'u ‘akau ke lava ke to'o mai e kau pekia´ ki tu'a. Ne toe a'u foki ki ha tu'unga ne toe faingata'a ke ‘ilo e kau pasese´ ia tu'unga he tu'unga kovi ne nau ‘i ai´. Na'e pau ai ke ‘oatu e va'a makehe ‘a e kau Polisi´ kenau feinga ke tala pe kohai e kau pasese ne ‘i he kaa´. Ne paaki e pepa ni ‘oku te'eki ke ‘ilo ia pe fakaha kohai e kau pasese´.

‘I he faka'osinga e uike kuo ‘osi´ na'e mate ai ha fefine ia mei Porirua ‘i ha fakatu'utamaki ‘i ha'ane faka'uli ‘i ha ka pea ne ‘i ai ha kau pasese ‘e toko 5 he kaa´. Ko e pekia´ ne kei laiseni akoako ‘a ia ‘oku tapu ia he lao´ ke ne uta ha pasese.

‘I he uike ‘e 2 kuohili´ na'e pekia ai ha kau talavou Tonga ‘e toko 3 ‘i he fakatu'utamaki ia ‘i Mt Albert ‘i he fakatu'utamaki.

Fakatatau ki he fakamatala ‘a e pule he va'a Polisi he hala´, Alan Boreham ko e tokolahi e ngaahi fakatu'utamaki´ ko e to'utupu ‘oku ta'elaiseni pe laiseni akoako.

‘I he kuohili´ na'a nau fakangaloku pe hono sivi e kau faka'uli´ ‘o ‘eke ‘enau laiseni´ ka koe'uhi´ ko e lahilahi ‘a e fakatu'utamaki´ tenau fakafefeka ‘aupito hono ta'ofi mo ‘eke e lasinei faka'uli´. Pea ka ma'u ‘oku maumau'i ‘eni ‘e ‘oatu hangatonu ai pe e mo'ua $400 he taimi pe ko ia´.

‘Oku fakatu'utamaki e me'a ni he ‘oku lava ke ‘eke ai pe ‘e he kau Polisi´ ia e hingoa´. ‘Oku ma'u ‘e he nusipepa ni ha fakamatala falala'anga ne a'u ki he toko 5 e kau ‘ova Tonga ne fakafoki he vaha'a taimi ‘o e maloloo kilisimasi´ ko e ma'u he hala pule'anga´ pea toe ‘ova foki. Ko ia ‘oku taau ke faka'ehi'ehi e kau ‘ova´ mei he faka'uli ta'elaiseni´ mo e maumau lao´, he ko e hala vave taha ia ki he foki ki Tonga´.