Tanaki pa'anga Siasi Katoliká ke tokoni ki Niuê he maumau 'i he afaa´
Fa'u 'e Tevita K. Takitaki

NUKU'ALOFA- Na'e tâtânaki 'e he ngaahi palôkia kotoa pe 'o e Siasi Katolika Loma 'i Tonga ni 'i he Sapaté ha seniti ke tokoni ki he kainga 'o e siasi 'i Niuê.

'Oku kau foki 'a Niuê 'i he palôkia 'o e siasí 'i Tonga ni ka ko e tupu mei he 'ahia kinautolu 'e he matangi saikolone ko Hetá na'e tupukoso ai 'a e fakakaukau ke fai ha tokoni fakavavevave ki he siasí pea pehê foki ki he fonuá.

'Oku ongo pea uhu ki he kakai 'o e Siasi Katolika 'o Tonga ni 'a e fakatâmaki na'e huki tonu 'i he kainga 'o e siasí 'a ia ko e konga 'o e tokoni ko 'eni 'e fakahoko'aki ia 'a e ngâue ki he langalanga fo'ou hake 'a e fonuá pea pehê ki he ngaahi falelotu na'e maumau'i 'e Hetá.

Na'e fakahâ foki 'e Busby Kautoke mei he komiti ngâue ki he ngaahi fakatamaki fakaênatulá 'a e siasí mei he 'ulu'i 'ofisi 'i Toutaimaná 'oku fai 'a e tâketi ke a'u 'a e tokoní ki he $116000 ka 'e tipeni pe ia mei he ivi 'o e siasí.

'' 'Oku 'i ai foki 'a e faka'amu ke kau mai mo e ngaahi siasi 'i mulí 'i he tokoni ko 'ení pea 'oku 'ikai 'uhinga ki he senití pe ka 'oku fiema'u lahi ha ngaahi tokoni fakame'atokoni, vala mo e naunau langa foki'', ko e fakahâ ia 'e Busby.

'Oku fai foki mo e feinga na'a lava moha polokalama ako ki he tokateu ki he ngaahi fakatamaki fakaênatulá hei'ilo na'a toe hoko mai ha matangi 'i he kaha'ú.

'Oku mahu'inga foki 'a e ngaahi fakakaukau ko 'ení ka na'e totonu ke fai 'a e ngâue koia ki mu'a kae 'oua 'e tatali pe ke toki hoko mai pea toki alasi.

Kaekehe na'e toe fakahâ foki 'e Busby na'a ne sio tonu ki he maumau 'a Hetá hili ha 'aho 'e ua mei he 'aho na'e to ai 'a e matangí ka 'i he me'a na'a ne fakatokanga'i ko e maumau lahi na'e hoko ki he fonuá pea kau foki mo e kiai mo e falelotu lahi 'o e siasí.

'Oku fakafuofua ki he kakai 'e toko1700 tupu 'i he motú pea ko e toko 300 tupu ai ko e kainga Tonga .