Puna 'i he Royal pea foki vakatahi
Fa'u 'e Taina Kami Enoka

Tu'unga 'i he maumau 'a e vakapuna puna fakalotofonua (Shorts 360) 'a e Royal Tongan Airlines na'e fakafuofua ki ha kau pâsese 'e toko uongofulu tupu na'e 'ikai ke nau lava 'o folau mai ki Tongatapu 'i he uike ni ka nau tukuvakaa´ 'i Vava'u.

Fakatatau ki he fakamatala 'a ha tokotaha, na'e maumau 'a e mîsini 'o e vakapuna´ 'a ia 'oku lava ke heka ai 'a e toko 33. Na'e iku 'o talitali ki ha fo'i mîsini ke fetongi'aki ia 'a ia na'e toki tau mai 'i he Tokonaki´, ka na'e toki tukuange mai ia 'e he Potungâue Kasitomu´ 'i he efiafi Monite´, 'i he hili hono totongi 'a e tute´.

'I he taimi ko ia na'e tu'u ai e vaka ni na'e iku 'o ngâue'aki 'a e vakapuna twin otter ke 'ave 'a e kau pâsese´ mo fakafoki mai mei Vava'u 'i he uike ni. Pea na'a ne fakahoko ai ha ngaahi fepuna'aki makehe 'a e kautaha´.

'I he a'u mai ki he Pulelulu´, na'e fakafuofua pe ki he toko nima na'a nau kei tali 'i Vava'u´. Na'e 'amanaki ke kamata puna 'a e vakapuna Shorts 360 'i he efiafi Pulelulu´.

Na'e mahino 'a e mole lahi na'e hoko´ ki he kautaha ni, he 'oku angamaheni'aki e puna ki Vava'u tu'o tolu ki he tu'o fâ 'i he 'aho 'a e vaka ni.

" Ko e me'a pango 'a 'ene hoko´ 'i he taimi 'oku tokolahi ai 'a e kau pâsese´, ka 'oku mau ngâue mâlohi ke feinga ke 'osi 'a hono 'omai e kau pâsese´ ki Tongatapu," ko e lau ia 'a e tokotaha mei he kautaha´.

'I he Pulelulu ai pe na'e 'ikai ke kei kataki e ni'hi ia 'o e kau pâsese´ ka nau iku folau mai nautolu ia 'i he MV Pulupaki´ mei Vava'u, 'o nau toki a'u mai ki Nuku'alofa ni 'i he pongipongi Tu'apulelulu´.

'I he fakamatala 'a e pâsese 'e taha ki he nusipepa ni, na'a ne kole ki he 'ofisi 'o e Royal Tongan 'i Vava'u´ ke nau totongi fakafoki ange 'a e toenga 'o e folau´ ke lava kenau totongi 'aki 'enau totongi vakatahi ka nau fei mo foki mai, ka na'e fakahâ ange 'e he kau ngâue´, 'e toki lava pe ia 'o ma'u ki Nuku'alofa.

"'Oku 'i ai 'a 'eku vaka ki Nu'usila 'i he Tu'apulelulu´. 'E tau e vakatahi´ 'i he vaha'a 'o e 9 ki he 10 pongipongi, pea 'oku lahi e ngaahi me'a ke u 'ai´," ko e lau ia 'a e pâsese ni.

Na'a ne pehê na'e tonu ke nau foki mai 'i he Mônite´, ka na'e fonu 'a e vaka´ ia 'i he fâmili 'o e Kôvana Vava'u.

" Na'e toki tohi pe 'a 'enau tîkite´ ai, ka mau siosio atu pe 'akimautolu 'a e kau pâsese´," ko 'ene lau ia mo ne fakaha 'a e ta'efakafiemâlie lahi kianautolu 'a e kau pâsese´ 'a e founga filifili manako ko eni´ kenau tali nautolu ne tuku vakaa´ kae fika 'uluaki mai e famili ia 'o e Kovana´.

Ko e Kovana foki 'o Vava'u´, 'Akau'ola ko ia 'oku Tokoni Sea 'i he Poate 'a e Royal Tongan.

'I he fakahâ atu ki ai 'e he Taimi 'o Tonga´ kuo fakaha 'e he Kauataha Royal Tongan 'e 'i ai 'a e vaka lahi 'apongipongi´, na'e 'ikai pe ke toe to lelei ha me'a ia ki he tokotaha ni la ne pehê mai 'oku "ta'epau ia, pea 'oku pau ange 'a e MV Pulupaki ."