|
Totongi pe 'e Tonga 'ene kau sotia ki 'Iulaaki´
KO E fakahaa mahino eni 'e he 'Amapasitoa 'Amelika ki Tonga´, David Laurence Lyon, 'i he uike kuo 'osi´ 'o pehee, 'e totongi pe 'e he Pule'anga Tonga´ e vahe mo e malu'i 'o 'ene kau sotia 'oku 'amanaki ke nau kau atu ki he tauhi melino 'i 'Iulaaki´.
Ko e folau´ leva mo e ngaahi fakamole kehe´ 'e fua ia 'e 'Amelika.
Ko e fuofua taimi eni 'e kau atu ai 'a Tonga ki ha tauhi melino lahi pehe´ ni tukukehe 'a e 'otu Solomone´ 'a ia 'oku lolotonga 'i ai 'ene kau sotia tauhi melino ai.
Kuo lahi foki hono fakaanga'i mei Nu'usila e pole 'a Tonga ke kau 'i he tauhi melino 'i 'Iulaaki, 'o pehee 'oku totonu ke nau nofo 'o tokoni he langa 'o Tonga , he 'oku lava lelei pe 'e he ngaahi fonua lalahi ia 'a e tauhi melino.
Lolotonga ko eni e 'a'ahi 'a e 'Amapasitoa´ ki Tonga he 'aho 14 ki he 16 'o e mahina ni´ na'a´ ne fakafuakava'i ai ha kau pisikoa 'e toko 20 fo'ou ki Tonga . Pea 'i he taimi tatau na'a´ ne fakama'ala'ala ai pee 'a e puipuitu'a ki he founga ngaue fo'ou 'a hono 'ofisi´ ki he kole visa 'a Tonga ki 'Amelika´, 'a ia kuopau ke a'u sino ai e tokotaha kole visa´ ki he 'Ofisi 'Amapasitoa 'i Fisi´.
|
