Fakaanga'i 'e 'Amelika e Lao Nusipepa 'a Tonga´
fa'u 'e Mateni Tapueluelu

NUKU'ALOFA: KUO fakaanga'i 'e he 'Amapasitoa 'Amelika ki Tonga´, David Laurence Lyon, 'a e Lao Nusipepa 'a e Pule'anga Tonga ne toki paasi´, 'i ha'ane 'a'ahi 'aho 'e tolu ki Tonga , fakatatau ia ki he Makasini Matangi Tonga´ .

Ne pehee ai 'e he 'Amapasitoa´ ne lelei e vaa e ongo fonua´ ka ko e fo'i fa'u lao ko ia 'a Tonga ke ne pule'i'aki e metiaa´, "... ko e me'a ia 'oku 'ikai ke mau sai'ia ai.." ko e liliu Tonga ia 'ene lea Pilitania´.

"'Oku 'ikai lava ke ke pule'i e tau'ataaina e lea´, he ko e totonu ia e tangata´, pea kuo u fakahaa ia ki he tokotaha kotoa he pule'anga´ ne u fetaulaki mo ia 'i he taimi ne u fe'iloaki ai mo e Sekelitali Lahi ki he Kapineti´ mo e Palemia Le'ole'o´.

"'E kau eni ia 'i he'emau lipooti ki he Totonu 'a e Tangata´ 'i Tonga´."

'I he'ene 'analaiso e tuukunga 'o Tonga´, ko e mitiaa´ pe 'a e matapaa 'e lava ai e kakai´ 'o fakahaa honau loto´ mo kau atu he fakahoko tu'utu'uni 'a e fonua´, he 'oku kapui 'e he kau pule tokosi'i´ 'a e pule'anga´ pea 'oku meimei ko kinautolu pee 'oku nau toe fakalele pisinisi´. 'Oku mahu'inga ai ke tau'ataina e mitiaa´ ke lava e kakai´ 'o manava hake.

Ko e lao eni ne liliu ai e kupu 7 'o e Konisitutone´ ke tamate'i ai e ngaahi nusipepa muli´. 'Oku lolotonga fakahuu atu foki e kole 'a e ngaahi nusipepa´ ki he pule'anga´ ki he ta'u´ ni 'o ngata 'i he 'aho 31 e mahina ni´. Ko e vaha'a taimi eni 'oku ui ko e grace period pea neongo 'oku lele e ngaahi nusipepa kehe he vaha'a taimi ko eni´, kuo iku ta'ofi e Taimi 'o Tonga´ 'i hono fakatanga'i 'e he Potungaue Polisi´.