Fakatau ha sikuta ke fetongi'aki e Pajero
Fa'u 'e Taina Kami Enoka

'Oku tui 'a Allen Hoeft mei Lotofoa, Ha'apai, 'a ia 'oku ne nofo 'i Taiuani, 'oku ne ma'u 'a e kî ki hono solova 'a e palopalema ki he lahi 'a e ngaahi me'alele 'i Tonga ni.

Ko e kii´, ko hono fetongi'aki e me'alele, 'aki e paiki sikuta (scooter).

Pea kuo ne fokotu'u 'a 'ene pisinisi ko e Hoeft Star 'i Olota'ane, Tofoa, 'i he taumu'a ke fakatau ki tu'a 'a e scooter 'e 2000 'i Tonga ni. 'I he taimi tatau, 'oku ne 'amanaki ke fokotu'u mo ha ongo kautaha 'i Ha'amoa mo Fisi.

Na'e 'i Tonga ni 'a Allen 'i he mâhina 'e tolu kimu'a pea ko e 'uluaki me'a na'a ne fakatokanga'i´, ko e lahi e me'alele.

" Na'u tui ta'etoeveiveiua, 'e lava ke manakoa 'a e scooter 'i Tonga ni. 'Oku tau fai pe me'a´ 'aki 'a 'etau fakaukau lelei taha," ko e fakamatala ia 'a Allen 'i he faka'eke'eke mo e Taimi 'o Tonga 'i he Falaite. Pea 'oku ne tui, 'i ha 'osi e mâhina 'e ono mei heni, 'e lahi 'a hono ngâue'aki e heka scooter, he 'oku ma'ama'a ange, pea 'oku 'utu T$5 pe pea fonu e tangikê. 'Oku 'ikai ke lele kia, pea 'oku mâlohi mo vave 'a 'ene lele. 'Oku ne ma'u 'a e scooter he kalasi 'o e Yamaha, Honda, Peco, Sanyang mo Kimco.

Kuo ne 'osi 'ave 'a e kau ngâue 'e toko fâ ke ako ngâue 'i Taiuani ki he fa'ahinga mala'e ko eni, pea kuo nau foki mai, 'o ako'i 'a e tôenga 'o e kau ngâue. Pea 'i hono fokotu'u 'a e ngaahi va'a 'i he ngaahi motu´, 'e toe 'ave 'a e ni'ihi ko eni ke nau toe ako'i mo ha kau ngâue fo'ou ai. Kuo ne 'osi hû mai mo e ngaahi kongakonga 'o e scooter, ke tokoni ki he taimi ko ee 'e hoko ai ha maumau.

Ko e talu 'a hono fokotu'u 'a e pisinisi, 'oku te'eki ai ke tu'uaki pe tu'u ha fa'ahinga faka'ilonga 'i he Hala Taufa'ahau pe 'i he fale ngâue. Ka kuo 'osi fakatau atu e scooter 'e 100 tupu.

'Oku pehê 'e Allen, ka ola lelei 'a e feinga 'i Tonga ni, Fisi mo Ha'amoa, 'e toe fai mo hono fakakaukau'i 'a hono fokotu'u ha pisinisi tatau 'i he ngaahi fonua Pasifiki kehe.

'Oku ne pehê na'a ne fakahingoa 'a e kautaha ko Hoeft Star, koe'uhî ko 'ene manatu ki hono fâmili´. Pea ko e Star, ko e fetu'u 'e ngâue'aki ia ko ha faka'ilonga ia (logo) 'i he ngaahi scooter.

" 'Oku 'ikai ke toe fai ha ako faka'uli ia 'i he scooter. Koloa pe ke te poto 'i he heka pasikala´," ko e lau ia 'a Allen.

'Oku ma'u fakataha pe e scooter mo e tataa´, pea 'oku te lava 'o ma'u 'a e scooter 'i he T$600 ki he T$1000.

Ko e ta'u eni 'e 15 'a e nofo 'a Allen 'i Taiuani, 'a ia 'oku ne ngâue 'i he mala'e 'o e môtolo´, pea 'oku ne fa'a kau ki he ngaahi tu'uaki 'o e ngaahi kautaha komipiuta, vala, mo e ngaahi koloa ki he 'ulu. (hair products).

'Ikai ke ngata ai´ ka na'a ne kau foki he kai 'eti faiva 'iloa 'i Taiwan .