Kei lele pe langa hotele 'o Wong
Fa'u 'e Taina Kami Enoka

NEONGO 'oku te'eki ai ke a'u mai 'a Dr Sam Ling Wong ke vakai'i 'a 'ene hotele 'i Fua'amotu, 'ai a 'oku 'iloa ko e Royal Tonga International Hotel, 'oku kei hokohoko atu 'a e ngâue ki hono langa´.

'Oku 'i Tonga´ ni ai e kau ngâue mei Bangladesh 'e toko 32, pea 'oku pehê 'e he tokotaha 'o e kau ngâue´, 'oku nau 'i heni ke feinga ke faka'osi'osi e langa, mo hono fakataila 'a e fale, fakahoko mo e ngâue 'uhila mo e ngaahi me'a kehekehe pe.

'I he'ene fetu'utaki fakamuimui mo Dr Wong, na'a´ ne pehê 'e tau mai ki Tonga ni 'i he uike kaha'u´, pea 'e toki lava ai ke fakahoko ha faka'eke'eke mo ia.

Na'a´ ne faka'ikai'i e lau 'o pehê 'oku 'ikai ke ma'u e vahe 'a e kau ngâue mei Bangladesh pea 'oku 'ikai ke tauhi lelei'i kinautolu.

"'Oku tauhi lelei'i kimautolu 'e he kakai´, pea a'u ki loto'â, 'oku fa'a ma'u 'a 'emau me'atokoni mei ai. Kapau 'oku fiekaia ha taha, 'o a'u ki he tu'apoo´, 'oku nau ô mai 'o kumi me'akai ki hoku 'api´," ko e 'ene lau´ ia.

Na'a´ ne pehê kuo 'osi tû'uta mai e ngaahi koniteina mei Malêsia ke fai'aki 'a hono faka'osi'osi e ngâue´, pea neongo 'oku 'i ai e fakatu'otu'a ki ha ta'u 'e ua, 'oku ne loto ke feinga'i 'a e hôtele´ ke 'osi kae foki â ki hono fonua´.

Na'e tanu pou 'a e hotele´ ni 'e he 'Ene 'Afio´, Taufa'ahau Tupou IV 'i Fua'amotu 'i he 1994, pea na'e kamata leva 'a e langa´. Pea na'e a'u ki he taimi kuo li'aki e hôtele´ 'o ta'e'osi 'i he ngaahi ta'u lahi.

Kaekehe, na'e 'i ai e ongo koniteina na'e omai mei Taileni, 'a ia na'e 'i ai ai e naunau ki he hotele´, pea na'e talu 'a hono 'omai 'i he ta'u 2000, na'e iku 'o puke 'e he Potungaue Kasitomu´ 'i he ta'u kuo 'osi´, ko hono ta'etotongi e ngaahi fakamole ki ai´. Na'e iku 'o fakatau atu e ngaahi naunau´ 'e he Kasitomu´, kae lava ke ma'u e ngaahi fakamole ko ia´.

" Na'e iku pe 'o toe kumi pe 'e he kau ngâue 'o Dr Wong 'a e naunau ko 'eni´, 'o nau ma'u ma'ama'a ange 'i he mahu'inga totonu´," ko e fakamatala ia 'a e tokotaha mei he kautaha Dateline Shipping.

'I he fetu'utaki fakamuimui 'a e Taimi 'o Tonga mo Dr Wong 'i he ta'u kuo 'osi´, na'a´ ne pehê 'e 'osi e konga lahi 'o e hotele´ 'i Sepitema 'o e ta'u kuo 'osi´. Ka 'oku kei hokohoko atu ai pe 'a e ngâue´ he taimi´ ni pea 'oku te'eki ke fakapapau'i pe 'e 'osi´ ki 'a fee.