Fehu'ia paaki tohitapu Tokaikolo´

NA'E tukuange atu e Tohitapu fo'ou 'a e Siasi Tokaikolo 'Ia Kalaisi´ kitu'a lolotonga 'a e kâtoanga Siupeli 'i Nuku'alofa he mâhina kuo 'osi´. Kuo lahi e talanoa fekau'aki mo hono toe paaki ko ia 'e he Siasi Tokaikolo´ 'a e Tohitapu´ koe'uhi´ 'oku pule'i ia 'e he Bible Society 'a Tonga´, pea kuopau ke ma'u ha ngofua kae toki paaki 'e ha taha.

Ko e Tohitapu´ ni 'oku 'i he T$60 ki he taha. 'I hono fakatauhoa ki he mahu'inga 'o e Tohitapu angamaheni´, 'oku fakatau ia 'i he T$24.65 pe ko e T$39 ki he taha 'i he Faletohi 'a e 'Otumotu Anga'ofa 'i Nuku'alofa´. Ka ne pehê 'e he tokotaha mei he Fale Tohi´, ko e Tohitapu angamaheni´ pe, 'ai a 'oku nau 'ota mai mei muli´, 'oku nau fakatau atu´.

'I he fetu'utaki ki he Televisione OBN, 'a ia 'oku fakalele 'e he foha 'o e Palesiteni 'o e Siasi Tokaikolo´, Sangster Saulala, na'e pehê ai 'e he tokotaha, 'oku fakatau pe 'a e Tohitapu´ 'i he 'api nofo'anga'o Faifekau Toketâ Liufau Saulala´, pea ko e kalasi pe 'oku takafi 'uli'uli´ 'e lava ke fakatau kitu'a´ 'i he T$60. 'Oku mahino'i foki 'e he nusipepa´ ni 'oku takafi lanu kehekehe e ngaahi tohitapu na'e paaki 'e he Siasi Tokaikolo´.

Kuo ma'u 'e he nusipepa´ ni e fakamatala pau 'oku lolotonga fai e ngâue 'a e Siasi Uesiliana Tau'ataina 'o Tonga´, 'o fekau'aki mo e totonu ki hono toe paaki 'o e Tohitapu´ ka na'e 'ikai loto e tokotaha fakamatala´ ke fakahaa faka'auliliki mai kae 'oua leva ke maau 'a e ngâue 'oku fai ki ai´.

'I Tonga´  ni ko e Kautaha Tohitapu´ pee, 'a ia 'oku 'iloa ko e Bible Society, 'oku´ ne ma'u e ngofua ki hono paaki e Tohitapu´. Ko e Tohitapu eni 'oku 'iloa ko e Tohitapu Katoa´ .

Kaekehe, ko e Tohitapu fo'ou 'a e Siasi Tokaikolo´, 'oku takafi pea lava ke sipa'i. 'Oku 'asi 'i he takafi´ e lea ko e, 'Ko e Tohitapu Kâtoa', Fakamanatu Siupeli Siliva 'o e Siasi Tokaikolo 'Ia Kalaisi, 1978 - 2003. 'Oku toe 'asi 'i loto, A Study Bible in Tongan, pea 'oku copyright pe ki he Siasi Tokaikolo 'Ia Kalaisi´, Tonga .

'Oku 'i ai mo e Talateu peesi 'e valu 'a e Palesiteni´, 'a ia 'oku´ ne fakaiikiiki mai 'a e Tohitapu´, ko e tohi makehe ia, ko hono tohi 'o e Tohitapu´, Ko e Ngaahi Lea 'o e Tohitapu´, Tohitapu Faka-Tonga, Liliu 'a Misa Uesi, Liliu 'a Toketâ Molitoni, mo e Tohitapu Fakamanatu Siupeli Siliva. 'Oku 'i ai mo e konga ki he tuku kolôlia 'i he kei lâkoifie fuoloa 'a e Tama Tu'i´, pea ki hono faitâpuekina 'a Kuini Halaevalu Mata'aho´.

"I he taimi tatau foki 'oku fakafeta'i lahi 'a e kaingalotu Tokaikolo´, koe'uhi, ko e hokosia 'o e ta'u mahu'inga ko 'eni 'o e Siasi´, 'oku laumâlie lelei pe 'a 'Eiki Titilupe Fanetupouvava'u Tuita, mo 'Eiki Fatafehi Nikotîmasi Vaha'i," ko e fakamatala ia 'a e Talateu 'o e Tohitapu´.

'Oku´ ne faka'osi'aki e fakamâlô ki he kau taki 'o e Siasi´ 'i he ngaahi fonua kehekehe, mo e kakai 'o e siasi´.