'E faka'ilo nai 'Eseta Fusitu'a?

NUKU'ALOFA: KUO ma'u 'e he nusipepa´ ni ha fakamatala falala'anga 'oku 'i ai e ngaue fakalao fekau'aki mo e Seketali Lahi mo e Sekelitali ki he Kapineti´, 'Eseta Fusitu'a, ki hono lohiaki'i 'o e Tu'i´ mo hono fale´ fekau'aki mo e 'api 'i he mali 'a Matai'ulua Fusitu'a mo Lupepau'u Tuita 'i Sune ta'u kuo 'osi´.

'Oku 'ikai ke loto e tokotaha 'oku´ ne fokotu'utu'u e faka'ilo´ ke fakahaa leva 'a hono hingoa´, ka 'oku´  ne pehee 'oku´  ne fatu e fokotu'u faka'ilo 'o 'Eseta Fusitu'a´ pea te ne fakahuu atu ki he Potungaue Lao 'a Tonga (Crown Law) mo e fokotu'u ko honau fatongia totonu ia ke fakahoko e faka'ilo ko ia´. Na'a´ ne pehee´ 'oku 'amanaki´ ke ne fakahuu atu eni 'i he uike kaha'u´.

Kuo lahi foki 'a hono tukuaki'i 'i he mitiaa´ ko e loi ne fakahoko 'e 'Eseta mo hono famili´ ki he Fale 'o e Tu'i´ fekau'aki mo e 'api´, he na'e ongona e ongoongo lelei 'o e fa'ele 'a Lupepau'u´ 'i Novema hili pe ia e mahina 'e 5 e mali´.

Ka 'i he pongipongi hili e 'api´ ne laka ai e famili 'o e husepaniti´ ki palasi 'o fakatu'uta e ngaahi kofukofu 'o e 'api´ ko e faka'ilonga e mamalu mo e fuofua.

"Na'e hapai eni 'e he famili 'o 'Eseta ki Palasi, pea 'oku´ ne mo'ua ke ne fakamatala hono 'uhinga´ he 'oku ou lau 'e au ia ko e lohiaki'i 'o e anga fakafonua´ pea 'oku fai ia ki he taupotutaha 'o e fonua´ 'i he katoanga na'a´ ne tala ko e mali lahitaha 'i Tonga´," ko e lau ia 'a e tokotaha´ ni.

"Na'e toki fakatonuhia'i pe 'e 'Eseta 'i he TV mo e mitia´ 'a e 'uhinga 'oku totonu ai ke liliu e kupu 7 'o e Konisitutone´ 'o fakakonisitutone'i ai ke 'ulupunou 'a e mitiaa´ ki he anga fakafonua´ ka 'oku 'ikai ke ne faka'apa'apa'i."

Kaekehe, talu e 'asi e kaveinga´ ni 'i he mitiaa´ 'oku te'eki ha tali ki ai 'a 'Eseta. Kuo lahi ai e ngaahi tukuaki'i ko e taha eni e ngaahi 'uhinga ne fai ai e feinga ke tamate'i fakavavevave 'a e Taimi 'o Tonga´   mei Tonga´ he ko e ngaahi kaveinga eni ia te ne ala 'ohake´.

'Oku lolotonga feinga e nusipepa´ ni ki ha fakamatala 'a 'Eseta Fusitu'a.