Folau kongakau hono ua 'a Tonga ki Solomone

NA'E mavahe atu 'aneafi mei he mala'e vakapuna Fua'amotu´ 'a e kongakau fakamelino hono ua 'a Tonga ki he 'Otu Solomone´. Ko e toko 41 fakakatoa 'a e kau folau´ 'a ia 'oku taki ai 'a Kenolo Kuli Fakalolo.

Ne fakahoko 'i he 'aho Pulelulu´ 'a e laka fakatê faka'osi 'a e kongakau´ ni kimu'a pea nau toki mavahe´.

Na'e fai foki 'e he Tama Palemia´ 'Ulukalala Lavaka Ata 'a e lea fakamavae mo fakalotolahi ki he kau folau´ 'i he mala'e Pangai Lahi´.

'I he me'a 'a e Tama´ na'a´ ne pehê ko e kongakau 'uluaki 'a Tonga na'e 'i Solomone´ na'e 'i ha tu'unga ma'olunga 'aupito 'a e ngaue na'a nau fakahoko´. Pea 'i he'ene pehee´ 'oku ne faka'amu ke hoko'i atu 'e he kongakau hono ua´ 'a e ngaue lelei ko ia kuo 'iloa 'aki 'a e Fo'i Piliote´.

Kaekehe, fakatatau ki he fakamatala kuo ma'u 'e he nusipepa ni 'e hangatonu mei Tonga´ ni e kongakau hono ua´ ki Townsville 'Aositelelia 'o fai hono ki'i hinoi'i mo fakataukei'i ai kinautolu 'i ha fo'i uike 'e taha kimu'a pea toki tuku atu kinautolu ki Solomone´.

'Oku 'amanaki´ 'e a'u e kongakau hono ua´ ki Solomone kimu'a 'i he 'aho 2 'o Fepueli´ pea 'oku fakafuafoa ki ha fo'i mahina kakato 'e 6 'a e fo'i vaha'a taimi 'e faifatongia ai 'a e kongakau´ ni 'i he 'Otu Solomone´ 'a ia 'oku fakaangaanga te nau toki foki mai 'i he mahina ko 'Aokosi´.

Ko e tokoni foki 'eni 'a Tonga fakataha moNu'usila mo Fisi ki he kau tauhi melino 'a ia 'oku taki ai 'a 'Aositelelia.

Koe'uhi ne a'u 'a e 'Otu Solomone ki he tu'unga kuo 'ikai ke kei lava e pule'anga´ ke ne pukepuke 'a e tu'unga pule fakalao mo tauhi e melino 'i Solomone, ko ia ai ne fiema'u ke nau ui tokoni ki 'Aositelelia.

'Oku 'ikai ke ngata pe foki he tokoni fakakautau 'a 'Aositelelia, 'a ia 'oku kau atu ki ai 'a e ngaahi fonua hange ko Tonga , ka 'oku fai foki mo ha tokoni fakangaue fale'i mo e tokoni fakapa'anga ki hono toe langa hake 'a e fa'unga pule 'a Solomone mo 'enau tu'unga faka'ekonomika.