|
Te'eki ha faka'ilo hili hono tânaki e Taimi 'o Tonga´
'OKU te'eki pê ke puke pe faka'ilo ha taha talu hono tânaki 'e he kau polisi´ e Taimi 'o Tonga´ mei he ngaahi falekoloa 'e ni'ihi 'i Tongatapu he 'aho Tûsite 6 'o e mâhina ni´. 'Oku te'eki foki mo ha fetu'utaki ia mei he Potungâue Polisi Tonga´ ki he 'ofisi e Taimi 'o Tonga´ pe ko e hâ e 'uhinga ne nau tânaki ai e nusipepa´.
Kuo fakamahino eni ne tânaki 'e he kau polisi´ ia mo e pa'anga 'i he ni'ihi e nusipepa ne 'osi fakatau´. Ne kau heni e falekoloa OSB 'i Fanga´.
'I ha faka'eke'eke 'a e Nusipepa New Zealand Herald mo e Minisitâ Polisi´, Clive Edwards, he uike kuo 'osi´, na'e pehê ai 'e he minisitaa´ 'oku maumau'i pê 'e he Taimi 'o Tonga´ ia 'a e lao fo'ou ki he nusipepa´ neongo 'oku 'ikai mahino ko fê kupu 'oku maumau'i´.
Ne hâ foki 'i he ongoongo 'a e TV Tonga´ he uike kuo 'osi´ 'a e fakamatala 'o pehê ko e 'uhinga ne ta'ofi ai 'a e Taimi 'o Tonga´ he kuo 'osi 'ene laiseni´.
"'Oku ta'emahino e ngâue 'a e kau polisi´, he 'oku kei fakatau atu 'i he ngaahi falekoloa tohi 'i kolo´ 'a e ngaahi makasini muli´. Pea kei lele pê mo e ngaahi nusipepa kehe 'oku te'eki ke 'i ai ha'anau laiseni 'o kau ai 'a e Kele'a´," ko e lau ia 'a e 'Etita e Taimi 'o Tonga´ , Mâteni Tapueluelu.
"'Oku kei lele pê foki mo e Kalonikali Tonga´. Ko e vaha'a taimi atu ko eni´ 'oku ui ia ko e grace period 'a ia 'oku lolotonga fakahû kotoa atu ai 'e he ngaahi nusipepa´ 'a 'enau kole laiseni ki he ta'u ni´ pea 'e toki 'osi e taimi kole ko ia´ ki he 'aho 30 e mâhina ni´. Ko e 'uhinga ia 'oku lele ai 'a e Kele'a´.
"Ka ko e Taimi 'o Tonga´ pê 'oku ta'ofi´ pea 'oku mahino 'oku 'ikai ke kei fai e ngâue´ 'i he loto hangamâlie mo tau'atâina. Neongo na'e kalokalo e pule'anga´ 'o pehê na'e 'ikai ke fa'u e lao fo'ou´ 'o fakataumu'a ki he Taimi 'o Tonga´ ka 'oku 'ikai ke kei ma'ufia 'a e taaufehi'a´ mo 'enau mata'â ke fakafihia'i e Taimi 'o Tonga´ pê 'e taha."
'Oku lolotonga fakahoko foki 'e he Fakafofonga Lao 'a e nusipepa´ ni, Sifa Tû'utafaiva, ha ngâue fakalao ki he fakatonutonu´ ni.
|
