|
Tuli e kau taki 'o e Hotele Dateline
fa'u 'e Mateni Tapueluelu
NUKU'ALOFA: KUO fakamâlôloo'i ha kau taki mei he Janful International Dateline Hotel, 'o kau ai e Tokoni Talêkita Pule´ (Assitant Managing Director), Sîmote Po'uliva'ati.
Ko e ni'ihi kehe kuo fakamâlôloo'i´ 'oku kau ki ai e Tokoni 'Akauniteni Lahi´, Lemeki Talanoa, Pule he Ngaahi Loki´, Talaivosa Telefoni, , Supavaisa ki he totongi mo'ua´, Tupou 'Aho, Pule Sekiulitii´, 'Anotoni Fa'apoi, tauhi me'atokoni mo e kava´, Sifa Têisi mo ha tokoua kehe. Ne toe fakamâlôloo'i foki mo e tokotaha tauhi koloa mo e kuki 'e taha.
Fakatatau ki he lau 'a e ni'ihi ne faka'eke'eke 'e he nusipepa´ ni 'aneafi´, 'oku nau tukuaki'i ne hoko eni koe'uhi´ ne nau fakamo'oni ki ha tohi lâunga ne nau tuku atu ki he kau ma'u mafai lahi´ fekau'aki mo e ngaahi me'a ne nau tokanga ki ai mo ta'efiemâlie ki ai. Na'e kau heni e tuai 'a hono totongi atu e ngaahi pa'anga mei he'enau vahe´ ki he'enau ngaahi nô ne tâ he pangikee´ 'a ia kuo 'osi fai e femahino'aki ke totongi ange he taimi pau 'o hangê ko ia 'oku anga ki ai e kakai´. Tânaki atu ki ai´ ne toe tuai mo hono totongi 'enau tukuhau´ 'a ia ne 'osi to'o mei he'enau vahe´.
Na'e kamata e polokalama fakamâlôloo'i ko eni´ 'i Tîsema 'o e ta'u kuo 'osi´ 'ia Sîmote pê, pea 'i he 'aho 24, ne fai ai ha ki'i fakataha mo ha fakalelei mo e toenga e kau ngâue´. Na'e pehe ai 'e he kau fakataha´ ia kuo solova e palopalema´. Ne toe fakahâ ange foki 'e he Minisitâ Polisi´, 'a ia 'oku Tokoni Sea 'i he Poate 'a e Hôtele´, ko e tokoua kehe pê 'e fai ki ai e ngâue´. Ka 'i he 'aho 31 ne faka'osita'u kovi ai ha ni'ihi ia 'i he teketeka mâmâlie atu 'a e fakamâlôloo'i´ pea a'u mai ai pê ki he mâhina´ ni.
'Oku tukuaki'i 'e he ni'ihi ia 'oku 'ikai fakamahinoange ha 'uhinga ia 'a hono fakamâlôloo'i kinautolu´ ka ko e fakahâ ange kuo fai 'a e fakatokosi'i pea 'oku 'ikai toe fiema'u 'a e tu'unga 'oku nau 'i ai´. Pea ni'ihi 'oku nau faka'ikai'i honau tukuaki'i´.
'I ha fetu'utaki 'a e nusipepa´ ni ki he Hôtele Dateline, ne 'ikai fiemâlie 'a e tokotaha na'a´ ne tali e ngaahi fehu'i´ pea´ ne fakahâ ko e ngaahi fakamatala ia 'oku fakataautaha pea 'oku nau faka'apa'apa'i e kakai´ 'o 'ikai ai ke tuku ai ha'anau lau ki he nusipepa´.
'I he taimi tatau na'a´ ne vivili mai ke 'oange ke 'ilo pe kohai na'e ma'u mei ai e fakamatala 'a e nusipepa´ ni. 'I he fakahâ 'e he nusipepa´ ni 'e 'ikai ala tuku e hingoa ko ia´ ki tu'a´, ne pehê 'e he fefine tali telefoni´ 'e 'ikai ai ke nau toe fakahâ mai ha fakamatala pea ne tâpuni'i e telefoni´.
Kaekehe, ko e mo'oni´ foki ia 'e toki mahino pê 'i he fakamaau'anga´ pea kuo pehê 'e he ni'ihi ia 'o e kau fakamâlôloo'i´ 'oku nau lolotonga ngâue ki hano faka'ilo 'o e kau ma'umafai 'o e hôtele´ ki he tu'utu'uni kuo nau fai´ he 'oku 'ikai ha fehalaaki ia 'i he'enau tohi atu 'o fakahâ honau loto´ ki he ngaahi me'a 'oku nau tokanga ki ai´.
"'Oku mau fakataha tu'o tolu nai 'a e kau pule´ mo e kau supavaisâ he uike. 'Oku mau vakai ai ki he ngaahi me'a ke fakalele'i ai e ngâue´ mo e ngaahi me'a 'oku mau tokanga ki ai´. Ne mau fakatokanga'i 'oku 'ikai fu'u hoko ha me'a ia ki he ngaahi me'a ko ia´. Ne mau faitohi leva 'o 'ave e me'a 'oku mau tokanga ki ai´, pea´ ne liliu faka-Pilitânia ia 'e Sîmote ke lava 'o 'ave. Ne mau fakamo'oni ki he tohi ko ia´ pea 'oku ou tui ko e 'uhinga ia ne fai ai e ngâue kaite kimautolu´," ko e lau ia e taha e kau ngaue kuo fakamâlôloo'i´.
"Ne mau toe fakataha mo 'Uhila Liava'a, 'a ia ne Sekelitali Le'ole'o ia ki he Poate´ pea´ ne pehê 'oku´ ne poupoua 'emau loto lahi ke fakahâ homau loto´ pea ke 'ave tatau ange (cc) 'a e tohi´ ki ai ka ne 'ave ki he Poate´. Ko e tohi ia 'oku mau tui kuo fai ai homau siofi´."
Ko e Pule foki ia 'i he Hôtele´ ko e fefine Siaina ko Lucy Niu. Ka 'oku 'i ai mo e ni'ihi kehe kuo tukuaki'i 'e he ni'ihi kuo fakamâlôloo'i´ ki hono fatu mo kaunga ki he fale'i ne iku fakamâlôloo'i ai kinautolu´.
Na'e pehê 'e he taha 'o e ni'ihi ko eni´ 'oku toe 'a e kau taki nai 'e toko tolu 'i he ngâue´ ka ko 'enau fanongo´ 'e iku fakafisi pe mâlôlô pê mo e ni'ihi ko eni´.
'I he uike´ ni ne hâ foki 'i he ongoongo ia 'a e pule'anga´ 'oku tupu tokua 'a e Hôtele´ ka 'oku fakafehu'ia ia 'e he ni'ihi ne tuku ki tu'a´ 'a ia 'oku 'i ai 'enau 'ilo ki he ngaahi tafa'aki fakapa'anga´. 'I he taimi tatau 'oku nau fakafehu'ia ai pe 'e ma'u koâ ha silini 'a e ni'ihi ko ia ne fakatokosi'i ki tu'a´ pê 'ikai.
"Ko e fakatokosi'i mai ia ko eni´ 'oku 'ikai mahino ia pe 'e ma'u ha silini ai kapau 'oku 'ikai ko ha tuli ha faikovi. Pea 'oku fakamamahi´ he na'e 'ikai ke te ngâue'aki ha silini hala."
|
