|
Tâpuaki 'ene ngâue he Kolisi Sanele´ kia Pâtele Setefano
Fa'u 'e Taina Kami Enoka 'i Apia , Ha'amoa
"'OKU kau 'a 'ete nofo 'i muli´, ke toe mafaoange 'a 'ete 'ilo´ pea lahiange mo e ngaahi me'a 'oku te ako ai 'i he ngaahi tapa kehekehe 'o e mo'ui´," ko e lau ia 'a e Tokoni Pule mo e Tauhi Pa'anga Tonga 'o e Kolisi Sânele´ 'i Momoa, Ha'amoa´, Pâtele Setefano Mataele 'o Longoteme´.
'I he 'uluaki kamata ngâue 'a Pâtele Setefano 'i Ha'amoa´, na'e 'i ai e ngaahi me'a na'e kehe mei he 'uluungaanga na'e maheni mo ia´. Na'e kehekehe 'a e founga 'oku fai 'aki e putu´, pea kehekehe mo e vâ 'a e kau taki lotu´ mo e fânau ako´. Ka na'a´ ne ako ai ke 'oua 'e fakaanga, kae ako mei he founga 'oku ngâue'aki´.
"Na'e ki'i faingata'a 'a 'eku fakaanganga ki he ngâue pehe ni´, ka na'u teuteu pê ki ai," ko e fakamatala ia 'a Pâtele Setefano.
Kuo´ ne lava 'o mahino'i 'a e ngaahi founga ngâue 'a e kau Ha'amoa´ pea 'oku´ ne lau ko e tâpuaki 'a 'ene ako ngâue kuo´ ne ma'u´.
" 'I he taimi´ ni, kuo lahi e ngaahi me'a 'oku ou ako 'i he fonua´ ni, pea kuo hoko ia ko e tapuaki lahi kiate au 'i he'eku mo'ui´ mo e ngaahi tâleniti 'oku ou ma'u´," ko e 'ene lau´ ia.
'I he'ene 'a'ahi mai ki Tonga´ ni he ta'u kuo 'osi´, na'a´ ne ma'u 'a e faingamâlie ke fai misa pea na'a´ ne vahevahe ai 'a 'ene ngaahi a'usia´. 'Oku´ ne pehê ka foki mai 'o ngâue 'i Tonga , ko e me'a mahu'inga ke teke´, ko e mo'ui 'a e fâmili´. 'Oku lahi e folau 'a e taha 'o e ngaahi mâtu'a ki muli´, pea 'oku ne uesia 'a e kaha'u 'o e fânau´.
"Kau ka foki atu, ko e taha ia 'o e ngaahi me'a 'oku ou loto ke u vahevahe mo e kakai´ 'a e mahu'inga 'a e nofo fakafâmili."
'I he vakai 'a Patele Setefano´ 'oku ne ako 'a e me'a lahi he'ene ngaue 'i Ha'amoa´ pea lava ke toe lototoange pea kuo hanga 'e he'ene ngaahi a'usia 'i Ha'amoa´ 'o tokoni lahi ki he 'ene tupu fakafo'ituitui´.
Ko Patele Setefano´ 'oku ne kau he Kautaha 'o Malia´ (Marist) pea ko 'ene fuofua ngaue 'eni ne vahe ia ki ai´ ke ne faiako 'i he Kolisi Sanele´. Koi e tu'u ki he kaha'u´ 'oku te'eki ke ne 'ilo pe ko e fee e feitu'u 'e fakahiki ia ki ai´ ka 'oku ne mateuteu ke 'alu ki ha feitu'u pe 'i mamani 'e vahe ia ki ai
|
