|
A'ahi 'a Donald ki Tonga
'OKU 'amanaki ke 'a'ahi atu ki Tonga 'a e talavou Tonga ko ia ko Donald McNulty 'a ia 'oku ne kau he kau hiva 'iloa 'a Nu'usila mo 'Aositelelia ko e Nesian Mystik.
Ko e 'a'ahi atu ko 'eni 'a Donlad ke hulu'i e fo'i polokalama TV (Documentary) 'o fekau'aki pea mo e kau hiva 'iloa ni. Koe'uhi´ ko e kau hiva ko 'eni´ 'oku 'i ai e ongo tangata Coock Island 'e toko 2, Mauli 'e 2, Ha'amoa 'e taha mo Donald mei Tonga, 'oku fiema'u ai 'e he TV2 'a Nu'usila ke fa'u ha polokalama 'o fekau'aki mo e tutupu hake 'a e kau tangata ni 'i honau 'atakai takitaha 'o ha'u ai pe 'o a'u ki he tu'unga ma'olunga 'oku nau 'i ai he taimi ni.
Ko ia 'oku folau atu ai 'a Donald mo 'ene fine'eiki´, Ma'ata Pasa McNulty ki Tonga ke hulu'i e polokalama ni. Ko Ma'ata´ mei he kolo musika ko ia ko e Hufangalupe´.
Ko e polokalama TV makehe ni 'oku talekita'i ia 'e he tuofefine ko ia 'o e tangata hiva ko King Kapisi´ ko e fefine ko Makereta Urale pea 'oku pule 'i he fo'i polokalama ni 'a Will 'Ilolahia. Na'e pehee 'e Will ko e kamata 'eni e ngaahi polokalama 'e hulu'i mo 'eti'i 'i Tonga pea 'e tu'uaki atu ai pe e fonua´ ki tu'apule'anga´.
Ko e kau hiva ni 'oku pule'i mo fakamaketi'i atu ia 'e he kautaha ko e ADK Entertainment. 'Oku pule'i fakataha nautolu mo e kau hiva ko e Logistix, Lavinia Williams, Barry Southgate, Soul Syndicate pea mo e Crystal . Ka 'oku fakatatau ki he fakamatala mei he ADK ko e Nesian Mystik 'oku manakoa taha he taimi ni 'i he fa'ahinga hiva Hiphop.
'I he fuofua tuku atu pe e 'alapama 'a e kau hiva ni ne a'u ai 'enau fo'i hiva 'e 4 'o tu'ukimu'a taha 'i Nu'usila ni. 'Ikai ke ngata ai´ka ne nau toe ikuna mo e ngaahi pale lalahi 'i he foaki pale 'a e musika´ 'i Nu'usila´ ni.
'Oku nau lolotonga hiki 'enau 'alapama hoko´ pea 'oku 'amanaki kenau tua takai 'i Nu'usila mo 'Aositelelia he ta'u ni. Kuo nau 'osi hiva fakataha mo e kau hiva Pink pea pehee ki a Robbie Williams.
Na'e kamata e kau hiva ni lolotonga 'enau feohi he 'apiako Western Spring pea hili pe e ako´ na'a nau hoko atu ai pe.
|
