|
Mo'ui mei he ngâue fakasanisani´ 'i Ha'amoa
Fa'u 'e Taina Kami Enoka 'i ' Apia , Ha'amoa
'OKU makehe 'a e ngaahi siueli, vaasi matala'i'akau, mo e ngâue fakamea'a 'oku fakatau 'e he Toni's Original 'i he fea 'o 'Apia´, he 'oku fakataha'i ai 'a e ngaahi sîpinga kehekehe 'o e tisaini Tonga´ mo Ha'amoa´, pea toe 'ai mo e kualatii´ ke 'i he tu'unga 'oku makehe ange mei he fe'au'auhi´.
Ko e fakamatala ia 'a 'Iasinita Atonio Galumalemana mei Lapaha, nofo Vaiusu, Ha'amoa, 'ai a 'oku´ ne fakatau atu e ngaahi siueli mo e ngâue fakamea'a ko eni´. Ko hono foha´, ko Toni, 'oku ne ngaohi kotoa 'a e siueli mo e ngâue fakamea'a mei he nge'esi niu´. Pea 'oku mahino 'a 'ene makehe 'i hono fili 'a Toni ke ne fakafofonga'i 'a e Kauataha Ngâue Fakamea'a 'o Ha'amoa´ ke faka'ali'ali 'a 'ene ngâue 'i he fe'auhi 'Olimipiki 'i Senê 'i he ta'u kuo 'osi´, mo e South Pacific Games 'i Fisi 'i he ta'u kuo 'osi ai pê. 'I he faka'ali'ali koloa na'a´ ne kau ki ai 'i Ha'amoa´, na'e ikuna ai 'a Toni 'i he tafa'aki faka'aati´, pea´ ne ma'u 'a e tikite folau ki Nu'usila mo e foki, fakataha mo e ST$2000.
'Oku pehê 'e 'Iasinita ko e ngaahi me'a 'a e kau Tonga´ ke nau fakasanisani 'a e me'a kotoa, pea 'oku tokoni ia ke 'asi makehe 'a e ngaahi koloa 'oku ngaohi mei he nge'esi niu´. Pea 'oku 'i ai mo e tokanga ke ngaahi ke faka'ofo'ofa ange mei he toenga 'o e kau fe'auhi´ (competitors), ko e 'uhî ke manakoa.
'I he lau 'a 'Iasanita, 'e lava lelei 'e he kau Tonga´ ke fai 'a e ngâue pehe ni´ pea ma'u ai 'a 'enau mo'ui.
" 'Oku lahi e niu´ 'i Tonga pea fele 'a niu motu'u," ko e lau ia 'a Isainita. 'I he fa'ahinga pisinisi pehe ni´, ko e fakamole´ lahi pe ki he mîsini sanipepa´.
Ka 'oku´ ne fakamamafa'i 'a e mahu'inga ke lelei 'a e tu'unga ngâue´, pea ke kakatoange 'a e ngâue fakasanisani´. He ko e fainga 'e ni'ihi, ko e kehe pê ke ma'u ha'anau pa'anga. 'I he fa'ahinga ngâue pehe ni´, 'oku´ ne fa'a fetaulaki ai mo ha kau Tonga 'oku nau 'eva pe ko fakataha mai ki he fonua´.
"Mo'oni 'oku ou mali mo e Ha'amoa ka he 'ikai pe ke ngalo 'a Tonga ia. 'Oku ou tala 'e au ko e Tonga au, he na'a te tupu hake pê 'i 'api, na'a te fiefia ai," ko e lau ia 'a 'Iasinita. Pea ka faingamâlie, 'oku´ ne feinga ke folau mai ki Tonga 'o sio ki hono fâmili´ tu'o ua 'i he ta'u.
Ko e ta'u eni 'e 20 'a e nofo 'a 'Iasinita 'i Ha'amoa, pea 'oku 'i ai 'a e ongo'i fiefia makehe 'a'Iasinita 'i he ta'u ni, 'i he ma'u sikolasipi 'a 'ene tama si'isi'itaha´, ko Loukinikini, mei he Pule'anga Ha'amoa´ ke ako 'i he mata'itohi LLB 'i he va'a 'o e 'Univêsiti 'o e Saute Pasifiki´ 'i Vanuatu.
'Oku toko ono 'a 'ene fânau´, 'ai a ko Fa'alua 'Ana Lolohea, nofo Salt Lake City, 'Amelika, Susana Ngaun, nofo Mangere, Nu'usila, pea ko Scotty, Naioka, Toni mo Loukinikini 'oku nau nofo 'i Vaiusu.
|
