|
Malôlô e pêpê ko e vela 'i he ngako fakapaku
fa'u 'e Manu Manuofetoa
NEIAFU ; NEONGO na'e fiefia e ngaahi famili kotoa 'i he'enau a'usia e ta'u fo'oú ni kâ na'e lo'imata'ia ha ki'i fâmili mei Feletoa Vava'u koe'uhi´ ko e fakatamaki ne hoko ki he'enau ki'i pêpê ta'u 1 mahina 5 ko 'Ana Heu Hasiata 'o ne hiki atu ai mei he maama ko 'ení ki he maama kaha'ú.
Ko e fâmili 'eni 'o Tevita mo Silivia Hasiata 'o Feletoá kâ na'á na nofo Saineai. Fakatatau ki he fakamatala kuo ma'u 'e he nusipepá ni 'oku pehê na'e fai ha fakapaku keke 'a e taha 'o e fânau fefine 'a e ongo matu'á ,Teu'alo'i Hasiata 'i ha'anau sitou kasa 'i he pongipongi Tokonakí ke nau fakapongipongi.
Na'e fakamo'ui 'e he ki'i ta'ahiné 'a e sitoú pea tu'u ki ai 'a e fakapakú kuo fonu he ngako 'o fakalili kae tâ 'a e mahoa'á. Lolotonga e fetakai 'a e ki'i ta'ahiné ni hono tâ e mahoa'á na'e 'ikai ke ne fakatokanga'i 'oku totolo mai 'a e ki'i pepeé 'o fakaava e 'ovaní.
Na'á ne toki hanga hake pê 'i he lea 'a e fakapakú fakataha mo e fakafoa e tangi 'a e ki'i pepeé 'one sio mai kuo kapui kotoa 'e he ngakó e 'ulú 'o kau ai e fofonga 'o e ki'i valevalé.
Na'e fai 'enau feinga fakavavevave 'o leleaki'i ki he falemahaki Ngû kâ na'e 'ikai pê ha toe 'utu 'e hakea ki he mo'ui 'a e ki'i valevalé ni koe'uhi´ na'e fu'u o'o pê 'a e vela ne hoko ki hono fofongá.
Ko e taha foki 'eni ha mate fakamamahi ki he familí he na'e 'ikai ke 'i ai e fae'é Silivia he taimi na'e hoko ai 'a e fakatamakí ni.
Fakatatau ki he fakamatalá ne kei nofo 'a e fa'eé ni 'i Feletoa 'i he nofo'aki me'a 'o e putu 'ene tangata'eikí pea 'i he taimi ne fakahâ atu ai 'a e ongoongo fakamamahí ni ne mei tu'u ai pê tâ hono mafú.
Kaekehe ko e fuofua mate 'eni 'i he 'otu Tongá ki he ta'u 2004 'i ha fa'ahinga fakamataki pehé ni.
'I he taimi tatau 'oku hoko ia ko ha fakatokanga ki he toenga e kakai 'o e fonuá ke nau toe tokanga ange 'i he taimi 'oku fakahoko ai ha'a nau ngâue, he 'e malava pê ke mole ha mo'ui 'i he taimi 'okú te ngâue ta'etokanga aí tautautefito 'i he taimi 'okú te ngâue fakataha ai mo e longa'i fânaú.
|
