|
Tutu penisini'i lolotonga 'a 'ene mate konâ
'OKU lolotonga fakaakeake 'i he Falemahaki Vaiolá ha talavou mei Kolofo'ou tupu mei hano tutu 'aki ia ha penisini lolotonga 'okú ne maa'umohe ko e mate konâ.
Ko e tokotahá ni ko Keni Vea 'a ia ne fai ha'a nau inuinu mo hano ngaahi kaungâtangata pê mei Kolofo'ou 'i he faka'osinga 'o e ta'u kuo'osí. Lolotonga e inú ne 'ikai toe lava 'a Keni ke ne toe hoko atu kâ na'á ne tokoto hifo ai pê 'i he feitu'u na'e fai ai 'enau inú 'o mate konâ.
Na'e 'alu 'o 'osi 'a e inú pea ne fai hono fafangu 'a Keni kâ ne a'u ki ha tu'unga ne fiu hono fafangu pea ne hanga ai 'e he taha 'a hono kaungâtangatá 'o 'ai ha fo'i fakakatakata vale 'a ia ko hono lingi penisi'i pea tutu'i tokua ko e me'a pê ia 'e 'â aí.
Me'apango he na'e fehâlaaki e fo'i fakakatakata valé ni 'o nau fiu feinge ke tâmate'i e afí 'i he'ene kâpui e sino 'o Kení. Na'e iku malele ai pê 'a e kau konaá ni kâ na'e 'ikai ke nau fakapapau'i ko e hâ ha'a nau tokoni fakavavevave ke tâmate'i 'aki e afí.
Kaekehe ne fai pê 'enau feingá 'o mate 'a e afí pea nau leleaki'i ai pê 'a Keni ki Vaiola. Na'e fai e feinga 'a e nusipepá ni ke 'a'ahi kia Keni kae me'apango he 'oku te'eki ai ke faka'atâ ke fai ha 'a'ahi ki he loki 'oku tauhi ai iá koe'uhi´ ko e tu'unga fakatu'utamaki 'oku 'i ai 'ene mo'uí.
Na'e fai e fepôtalanoa'aki mo e kau neesi 'oku nau ngâue kia Kení pea ne hâ mei he'enau fakamatalá koe vela lahi mo'oni na'e hoko ki hono sinó. 'I he taimi tatau ne nau pehê 'oku ngali faingamalie pê kâ kuopau ke tokoto 'i ha fo'i vaha'a taimi lôlôá ke fakaakeake lelei ai hono sinó.
Kuo fai foki e ngâue 'a e kau Polisí ki he me'á ni pea 'oku tukuaki'i 'a Pasuka Mapakaitolo ki he keisí ni. Ko Pasuká ko e taha ia e ngaahi fo'i tahi'itoa he timi 'akapulu 'a Kolofo'oú pea ne ma'u 'ene aleapau va'inga 'i Siapani.
Na'á ne 'a'ahi 'eve'eva mai ki Tongá ni 'i he kilisimasí mo e faka'osita'ú pea 'oku teu ke foki 'o hoko atu 'ene va'ingá. Kâ 'oku 'i ai e fakamatala 'o pehê ngalingali 'e mole 'a e faingamalie 'o Pasuká 'o kapau 'e fakapapau'i ai pê ko ia na'á ne fakahoko hono tutu penisini'i hono kaungâ tangatá.
'Ikai ko ia pê foki ka kapau 'e a'u ki he fakamaau'angá 'o hâ mei ai 'e mo'ua ngâue pôpula 'o 'ikai toe fai hano malu'i angalelei 'e 'âsili ai pê 'a e tu'u faka'ilonga fehu'i 'ene aleapau va'inga mo'ene kalapú 'i Siapaní.
|
