|
Fakamanatu ta'u 10 'o e kalapu sikolasipi Teketua 'o e Vai ko Lataí
Fa'u 'e Tevita K. Takitaki
Na'e katoanga'i fiefia 'e he kau memipa mo e kainga 'o Tungí mei Fua'amotu 'a e a'usia 'e he kalapu sikolasipi Teketua 'o e Vai ko Lataí 'a honau ta'u 10 'i he Tokonakí 'i he fale fakataha'anga Hoositeá.
Na'e foaki ai moha ngaahi pale ki he fânau ako 'e toko 11 na'e ola lelei mo tu'ukimu'a 'enau feinga akó 'i he faha'ita'u ako 'o e 2003.
Ko e ngaahi pale ko 'eni koha taki $100 'a ia na'e foaki ia 'e he taha 'o e kau memipa 'o e kalapú ko Solomone Tonga 'a ia na'a ne lava mai mei 'Amelika ke foaki 'a e ngaahi pale ko 'ení.
Na'e fakahâ foki 'e Solomone 'ene ongo'i fiefia 'i he katoanga mahu'inga mo fiefia na'e fakahokó pea ko e taha 'o e taumu'a mahu'inga 'o 'ene foaki 'a e ngaahi palé ke mahu'inga'ia 'a e tamasi'i mo e ta'ahine kotoa pe 'i he akó.
'' 'Oku ou fiefia lahi 'i he'eku fanongo 'oku ola lelei 'a e ako 'a e fânaú pea 'oku ou fakalotolahi kia kinautolu ko e akó pe 'e taha tene lava 'o tataki kinautolu kiha kaha'u 'oku leleí'', ko e fakahâ ia 'e Solomoné.
'I he taimi tatau 'oku 'ilonga 'a e ma'olunga mo e fakafiemâlie 'a e tu'unga 'o e akó 'i Fua'amotu 'a ia ko e taumu'a mo e kaveinga ngâue foki ia 'a e kalapú ke '' 'i ai ha Fua'amotu fo'ou 'i he kaha'ú''.
Kaekehe kuo 'i ai 'a e fânau tokolahi kuo 'osi 'enau akó pea kuo ngâue 'a e ni'ihi 'a ia ko e taumu'a ia 'a e kalapú ke nau ngaue'i ha Fua'amotu 'e taha ka ke kei 'aonga pe ki he fa'ahinga 'oku nau mahu'inga'ia 'i he akó.
Na'e foaki atu foki moha $3505 mei he Palesiteni 'o e kalapu 'Okanipeau 'o Halakakalá mei Nu'usila, Viliami Langi ke tokoni ki he fa'ahita'u ako 'o e ta'u ni.
Na'e fakahâ 'e Viliamí ko e kau inu kava pe 'eni ia mei Fua'amotu pea 'oku nau taumu'a mo kinautolu ke tokoni ki he kalapu sikolasipi Teketua 'o e Vai ko Lataí.
'' 'Oku si'isi'i 'a e iví mo e seniti 'oku mau foakí ka 'oku ou fakalotolahi atu fânau ke mou falala kakato ki he 'Eikí he ko e kamata'anga ia 'o e potó, ko e talatalaifale ia 'a Viliamí.
Na'e toe pehê foki 'e Viliam ko e konga pe 'eni hono feinga'i 'a e to'utupu Fua'amotu 'i Nu'usilá ke nau fâaitaha mo tokoni ki he fonuá 'aki ha'anau tâtânaki seniti mo inu kava.
Na'e 'i ai foki mo e sikolasipi fo'ou 'e ua ki he ta'u ni 'a ia ko e foaki ia 'e Tevita Tufunga ki he tokotaha mei he Kolisi ko Tupou mo e toko 1 mei he Kolisi Tongá 'a ia tene totongi 'ena aakó ki he ta'u kakato 'e taha.
Ko e kalapu ni foki na'e fokotu'u ia 'i he 1993 pea kuo 'i ai 'a e ni'ihi kuo 'osi 'enau akó pea kuo nau tokoni'i foki 'a e kalapu ni.
'I he ngaahi pale na'e foakí na'e kau kiai 'a Silia Pone, Mele Pakileata mo Mina Sevaki mei he Kolisi Kuini Saloté; Loloma Tokelau mei he Kolisi Tongá; Taukatelata Vakalahi mei he 'apiako Fokololo ê Haú; Salesi Kaufononga mei he 'apiako Ngoue 'o Hangó; Marlene Hill mei he Tonga Side School; Uikelotu Hê mei he Kolisi Talafo'oú; Hingano Pakileata mei he Kolisi Sia'atoutaí pea mo Patiola Pâhulu mei he Kolisi Tailulu.
'I he ngaahi pale na'e foakí na'e 'ikai 'uhinga ia ki he ngaahi 'ilo fakalokiakó ka na'e kau kiai 'a e pale ki he tu'ukimu'a taha 'i he fe'auhi sipoti fakakolisí 'a ia na'e ma'u ia 'e Patiola Pâhulu mei tailulu pea ko Mele Pakileata ko e faihiva lelei taha ia 'a e Kolisi Kuini Saloté ki he ta'u kuo'osí.
'I he toenga 'o e fânau na'a nau ma'u palé na'e maamaloa ai 'a Silia Pone pea fika tolu fakakatoa 'a Mina Sevaki 'i he Form 3 'o e Kolisi Kuini Saloté. Na'e kapiteni 'a Loloma Tokelau 'i he Form 4 'a e Kolisi Tongá, kapiteni 'a Uikelotu He he Kolisi Talafo'oú, ma'u 'e Taukatelata 'a e ta'u 'uluaki 'o e 'apiako Fokololo 'o e Haú, ma'u tipiloma he ngoue 'a Salesi Kaufononga mei hango pea ko Hingano Pakileata koia na'a ne ma'u 'a e ta'u 'uluakí 'i he Kolisi Sia'atoutaí.
'I he ola ko 'ení na'e fiefia lahi ai 'a e kalapú mo nau fiefia ke kei hokohoko atu pe 'enau fua 'a e ako 'a e ni'ihi ko 'ení.
|
