|
Fakanofo kau Minisita 'e 3
NA'E fakanofo 'i he Fakataha Tokoni 'o e Falaite kuo 'osi´ 'e he Tu'i Fakale'o´, Pilinisi Pule´, Tupouto'a ha kau Minisita fakataimi 'e toko 3.
Ko e kau Minisita ko 'eni´ ko e to'o hangatonu hake pe ia mei he ngaahi potungaue 'oku lolotonga mama'o ai e kau Minisita ko ia´. Fakatatau ki he fakamatala 'oku ma'u 'e he nusipepa ni 'e kamata ngaue 'a e kau Minisita fakataimi´ 'i honau lakanga Minisitaa´ he uike ni kae 'oua leva ke foki mai 'a e kau Minisita totonu´ mei muli.
'Oku fili ai 'a 'Alisi Taumoepeau ke ne hoko ko e Minisita Lao mo 'Ateniseniale fakataimi´ koe'uhi´ 'oku lolotonga mama'o hono mali´, 'Aisea Taumoepau ki muli 'a ia ko ia 'oku Minisita Lao´. 'Oku hu hake leva mo Sione Taumoepau 'o Minisita fakataimi 'i he Potungaue Ngaue´ he 'oku folau 'a Cecil Cocker. Pea 'oku fili pea mo Vika Fusimalohi ke ne hoko ko e Minisita fakataimi 'a e potungaue Leipa mo Fefakatau'aki koe'uhi´ ko e 'i muli 'a Dr. Masaso Paunga´.
'I he taimi tatau 'oku lolotonga 'i muli mo e Palemia´ pea 'oku hu hake pe ai 'a e Minisita Polisi´ 'o le'ole'o he lakanga ni.
'Oku fakahisitolia e fili Minisita ko 'eni´ he ko e toki fuofua taimi 'eni ke fili ai ha fefine ki he lakanga Minisitaa´ neongo ko 'ena fakataimi pe.
Neongo ne 'ikai ke tuku fakapule'anga ki tu'a e 'uhinga e fakanofo Minisita e toko tolu´ ni ka 'i he fakatatau ki he fakamatala 'a 'Isileli Pulu´ ko e taha e 'uhinga´ ko e lahi e mama'o 'a e kau Minisitaa´ ki muli´ pea tu'u ai e ngaue´ pea 'oku ne tui ko e ngaue 'eni 'a e Pilinisi Pule´ ke fakapapau'i 'e kei hoko atu pe e ngaue´.
Ko e Palemia´ foki mo Cecil Cocker 'oku na kau tonu he komiti Tokangaekina e ngaahi fakatu'utamaki fakaenatula´, ka ko e pango he ko e too mai ko ia 'a e matangi ko Heta´ 'o uesia 'a e ongo Niua´ 'oku lolotonga mama'o e ongo Minisitaa ia ko 'eni´.
'Ikai´ ke ngata ai´ ka ko e mama'o ko 'eni 'a e Palemia´ mo Cecil koe tokoni Palemia´ kae hu hake 'a Clive 'o fakahoko e lesisita 'oe ngahi nusipepa´ 'i he lao fo'ou´. Ko Clive 'oku ne kau he kau tu'u malohi ke liliu e konisiututone´ pea ko ia 'eni 'oku ne heka hake ki he Sea´ 'o fai hono sivi mo sitapa'i e ngaahi kole laiseni nusipepa´.
|
