|
Tokoni'i Mâmongá ki'i ta'ahine ne lavea he fakatu'utamaki
fa'u 'e Manu Manuofetoa
'OHONUA ; NEONGO 'a e hono lau e tô lalo 'a tu'unga faka'ikonômika 'o e fonuá 'oku kei tu'u pê 'a e Siasi Mamongá ko e lâ mo e poupou ki he kakai 'o e fonuá tautautefito ki he kakai 'oku faingata'iá.
'I he ho'atâ Monite 'o e uike kuo'osí na'e hoko ai ha fakatu'utâmaki 'i Mata'aho 'Eua 'a ia ko ha me'alele na'á ne hanga 'o tui'i ha ki'i ta'ahine ta'u 3 ko Pelenaise Vea 'o malô pê 'ene mo'ui.
Fakatatau ki he fakamatala kuo ma'u 'e he nusipepá ni 'oku pehê ko Pelenaisé ko'ene fa'eé ko 'Eva Vea kâ na'e pusiaki'i ia 'e he tokoua pê 'o 'Eva ko Kolona 'Ulu'ave. Kaekehe na'e fai ha ta'o keke 'a Kolona mo'ene pusiakí 'i he 'api siasi Mâmonga 'o Tongamama'ó 'i he 'aho Monité.
Na'e 'eva atu heni e fa'ê 'a Pelenaisé 'Eva Vea kia Pelenaise mo Kolona 'o fai 'enau pô talanoa. 'I he foki 'a 'Evá nae 'ikai fakatokanga'i 'e Koloná ia 'oku muimui 'a Pelenaise ia he tu'a 'o 'Evá 'a ia na'á na kolosi ki he tafa'aki 'e taha 'o e 'api siasí 'oku fai mei ai ha pasiketipolo.
Ne toe hanganoa heni mo 'Eva ia kae toe tafoki mai 'a Pelenaise ia ke foki kia Kolona mo e pehê atu ha me'alele 'o patô he ki'i ta'ahine ta'u tolú ni. Na'e pehê ne mamulumulu e fofonga 'o e ki'i ta'ahiné pea kamata ke 'asi mo e toto 'i he telingá.
Koe'uhí ko e tu'unga fakatu'utâmaki ne 'i ai e ki'i ta'ahine ni ne pehê ai mei he falemahaki 'o 'Euá 'oku fakapotopoto ange hano 'omai ki Nuku'alofa ke fakahoko ai hono faito'ó. Me'apango he na'e fiema'u ko'eni ke 'omai 'a e ki'i ta'ahine ni ku Nuku'alofá 'oku 'ikai ha vakapuna ia he taimi ko ia.
Ko ia ne angama'ulalo ai e Palesiteni Siteiki pea mo e kâinga lotu 'o e siasi Mâmonga 'o Tonga Mama'ó 'o nau haea ha vakapuna makehe ke fakafolau mai 'aki 'a Pelenaise ki he Falemahaki Vaiolá. Na'e 'ikai ngata pê 'i hono fakafolau mai ko'ení kâ ne nau toe fua mo e ngaahi fakamole kotoa ki he tokoto 'a Pelenaise 'i Vaiolá.
'Ikai ko ia pê kâ kuo toe lotolahi foki mo e kâinga lotú ni ke nau fua ha fa'ahinga fakamole pê 'o kapau 'e fakafolau atu 'a Pelenaise 'o faito'o 'i ha falemahaki 'i tu'apule'anga. Na'e 'osi fai foki hono sivi 'a Pelenaise pea ne hâ mei ai 'oku fasi hono nima 'e taha pea mo hono va'e 'e taha.
Ne fai foki e feinga ki vaiola ke fakapapau'i e tu'unga kuo a'u ki ai e mo'ui 'a Pelenaisé pehê ki he feitu'u 'e fakahoko ai hono faito'ó kâ na'e 'ikai ma'u ha faingamalie.
Kaekehe 'oku 'ikai ko ha toki fakahoko 'eni 'e he siasi Mâmongá ha fa'ahinga tokoni pehé ni he kuo tâ tu'o lahi 'enau tokoni ki he ngaahi tapa kehekehe pê hangê ko e ako, ngaahi kulupu to'utupu, tokoni fakahangatonu ki he ngaahi famili faingatâ'iá pea a'u pê 'eni ki he'enau tokoni ki he fanga ki'i longa'i fânaú.
|
