Ikuna ‘e he Toa´ e ipu Lavengamâlié
Fa‘u ‘e Tevita K. Takitaki

NUKU‘ALOFA— Kuo toe ikuna‘i pe ‘e he timi koula ‘a e Toa ko Ma‘afú ‘a e Ipu mo e pale $25000 ‘o e fe‘auhi ‘a Lavengamâlie ‘i he kalasi ‘uluakí hili ‘enau poko‘i ‘a Vainí ‘i he fainoló ‘aki ‘a e kai 18-0 he Tokonakí ‘i he mala‘e Teufaivá.

Na‘e foaki ai ‘e he tangata‘eiki Palesiteni ‘o e Siasi Tokaikoló, Faifekau Toketâ Liufau Vailea Saulala ha $5000 ki he Toa ko Ma‘afú ki he ‘enau toe ikuna‘i koia ‘a e fe‘auhi ‘o e ta‘u ni tu‘unga ‘i he‘ene palomesi ‘i he ta‘u kuo‘osí kapau tenau toe ikuna pea ‘e foaki mo e pale makehe.

Kuo hoko ai ‘a e Toa ko Ma‘afu koha fuofua timi kene ikuna‘i tuo tolu ‘a e fe‘auhi ni ‘a ia ‘oku taku ko e fe‘auhi pale pa‘anga lahi taha kuo fakahoko ‘i Tonga ni.

‘ Oku fakahisitolia pea fakangalongata‘a ki he kau va‘inga mo e kau poupou ‘o e timi ni ‘a e ikuna kafakafa na‘e fai ‘e he fânaú ka ‘i he taimi tatau tenau feinga ke toe malu‘i ‘a e langilangi ko ‘eni ‘i ‘Aositelelia he ‘oku fai kiai ‘a e fe‘auhi ‘o e ta‘u ni.

Kaekehe ‘oku hanga ‘e he fe‘auhi ko ‘eni ‘o faka‘ai‘ai ‘a e taleniti ‘o e fanau ke tupulaki ki ha tu‘unga ‘oku ma‘olung ange pea ‘ikai ngata ai ka ‘oku nau feinga ke ta‘ota‘ofi ‘a e to‘utupu mei he inu kava malohi ka nau tokanga ki he fe‘auhi he taimi ‘oku fai ai ‘a e ngaahi fakafiefia ‘o e Kilisimasí mo e ta‘u fo‘oú.

Kaekehe kuo tu‘o tolu hono ikuna‘i ‘e he Toa ko Ma‘afú ‘a e fe‘auhi ko ‘eni pea ngalingali he‘ikai lava ‘e ha timi kenau muimui ‘i he halanga faingata‘a ko ‘eni kuo foua ‘e he kau to‘a mei he kalapu ‘akapulu ‘a e Toa ko Ma‘afú.

Neongo ‘a e ulungia ‘a Vainí ka ko e timi fakalakalaka taha ‘eni ‘i he fe‘auhi ‘o e ta‘u kuo‘osí pea ‘ikai ngata ai ka na‘e ‘ave ‘e he‘enau kapitení mo foka 8 Vahanoa Fale‘ovalu ‘a e pale $100 ki he tangata va‘inga mâlie taha ‘o e fe‘auhi.

‘ I he fainoló na‘e mavava ‘a e fu‘u kakai na‘a nau tefua ‘i he mala‘e Teufaiva ‘i he fetaulaki ‘a e ongo timi hau ni pea ‘oku ‘ikai koha toki fetaulaki ‘eni ‘a e ongo timi ni ka na‘a na ‘osi fetaulaki ‘i he fe‘auhiufakakalapu ‘a e Vahe Tongatapu.

Na‘e ngungu ‘a e ongo timi ni ‘o ‘ikai toe tuku ha ivi ka ‘i he taimi tatau na‘e lahi ‘a e fêhalaaki ‘a Vainí ‘o iku tohi‘i tu‘o tolu ai ‘i he lisi ‘o e ikuna ‘a e timi koula koia ‘a e Toa ko Ma‘afú.

Na‘e mo‘oni pe ‘ena tâpepa‘i ‘a e fuofua hiki ‘o liunga ua ‘a e pale pa‘angá ‘o e fe‘auhí ‘a ia ko e fe‘auhi pale pa‘anga lahi taha ‘eni kuo fakahoko ‘i Tonga ni.

Fielau ‘a e maau mo lele ‘i matangi ‘a e fe‘auhi ni he na‘e taumu‘a mo kaveinga‘aki ‘a e fakalangilangi‘i ai pe hotau ‘Eiki ko Sisû Kalaisi.

Ko e kai ‘o e Toa ko Ma‘afú mei ha tata‘o ‘e ua, ‘aka fakahu ‘e taha mo e ‘aka tautea ‘e ua ‘o 18 pea ko e poini ai ‘e 8 ko e kai ia ‘a e feesi ko Sione Tu‘ipulotu ‘a ia na‘a ne ikuna ‘a e pale $100 mo e ipu ki he tangata ‘aka fakahu lelei taha ‘o e fe‘auhí.

‘ I he konga ‘uluakí na‘e fuofua fokotu‘u ai ‘e he Toá ‘a e kaí ki he papa ‘aki ha ‘aka tautea mei haafeuei ‘e he feessi ko Sione Tu‘ipulotu ‘o 3-0. Na‘e ‘ikai ‘unua ai ‘a e feinga ‘a e Toá ka na‘e toe fakahoko ‘e he‘enau haafe mohu faiva ko Sikuti Vunipola ha tata‘o mâlie mo‘oni pea hû mo hono ‘akahi ‘e Sione ‘o 10-0 ‘i he mâlôlô.

‘ I he timi ‘a Vainí na‘e tonu ‘enau kamata ka ‘i he tata‘o ‘a Sikuti pea na‘e hangê ai kuo nau holoa ka ki he timi ‘a e Toa ko Ma‘afú na‘e mahino ‘a e tokolahi ange ‘a ‘enau kau va‘inga matu‘otu‘a kenau pukepuke ‘a e va‘ingá.

Fielau hono foaki ‘a e pale $100 ‘o e tangata va‘inga mâlie taha ‘o e fainoló kia Sikuti he na‘e tonu ‘ene me‘a kotoa pe ‘i loto mala‘e tukukehe ‘ene huu‘i ‘a e tauhoa ‘a Vainí ‘one fakahoko ‘a e ‘uluaki tata‘o.

‘ I he konga hono uá na‘e tata‘o ai ‘a e peleki‘auuei ko Peni Fanua tupu mei ha‘ane muimui pulu hono hoa peleki‘auuei, ‘Ofa Misa ‘one fakaa‘u ki he laine tata‘o.

‘ Oku kau foki ‘a e ongo peleki‘auuei ‘a e Toá ‘i he siofi ‘e he ngaahi kalapu mei Pilitania pea ‘oku ‘ikai pe toe veiveiua ‘a e matu‘aki kalasi ‘a e va‘inga ‘a e ongo tangata ni.

Neongo na‘e mahino hono taki‘i mai ‘e he kapiteni ‘a Vaini ‘a ‘ene timi ka ‘oku mo‘oni ‘a e laú ‘oku ‘ikai ha to‘a ‘e tu‘u tokotaha.

Na‘e hangê ‘oku ki‘i ake mai ‘a Vaini ‘i he konga hono uá ka na‘e taimi si‘i pe pea ‘ikai tenau toe lava ‘o fakahoko ha palani va‘inga ‘e taha tupu mei he vave mo tô atu ‘a e tifeni ‘a e kau to‘a mei he Toá.

Na‘e a‘u ki ha taimi kuo tekelele holo pe ‘e he Toá ‘a e sikalamu ‘a Vainí ‘o kehe ia mei he taimi na‘e kamata ai ‘a e fetaulaki ‘a e ongo timi ni.

Ko hono mo‘oni na‘e ‘ikai mâlie‘ia ‘a e kau mamata ‘i he fetaulaki ‘a e ongo timi ni ka ‘i he miniti faka‘osí na‘e toki hanga ai ‘e Sione ‘o tuki tapuni honau puha mate mei ha ‘aka tautea ‘o 18-0.

Na‘e feinga ‘a Vainí ke ‘ai ha ta‘ovala ka ko hono mo‘oni na‘e matu‘aki faingata‘a kia kinautolu tupu mei he hangê ha ‘amaká ‘a e tifeni ia ‘a e Toá.

Kaekehe neongo ‘a e ulungia ‘a Vainí ka na‘a nau foki kinautolu mo e $15000 ki he fika uá ka ‘i he tau kâseté ‘a ia ko e tau‘i ‘o e ua mo e tolú na‘e kilikiti‘i ‘e he Marist ‘‘a e Sila Peluuá ‘aki ‘a e kai 30-18.

‘ I he fetaulaki ‘a e Toá mo e Marist ‘i he semifainolo na‘e ikuna pe ‘e he Toá ‘aki ‘a e kai 25-17 ‘i ha va‘inga na‘e lele ‘a e kai ‘o e Marist ‘o 17-0 pea toki tulikai ‘a e Toá ‘i he konga hono uá.

Ngalingali na‘e ‘i ai ‘a e fakakaukau kehe ‘i he kau va‘inga ‘a e Marist ‘o nau iku mamahi ai ‘i he Toá ka ko e fo‘ui pe ‘o kinautolu.

Ka ‘i he semifainolo ‘a Vaini mo e Sila Peluuá na‘e fakamamahi‘i ‘e Vainí ‘a e Sila ‘aki ‘a e kai 13-12 ‘i ha va‘inga matu‘aki mâlie mo‘oni.

Ko e pale ‘o e Marist ko e $12000 kae $10000 ‘a e Sila Peluuá pea ko e pale makehe ki he tangata foueti lelei tahá na‘e ikuna ‘a e pale $100 mo e ipu koia ‘e Lisiate Fakalelu mei he timi ‘a Ha‘ateihó. ‘I he pale ki he tangata tautua‘a lelei taha ‘o e fe‘auhi na‘e ikuna ‘a e $100 mo e ipu koia ‘e he feesi ‘a e Sila Peluuá, Tevita Kaufusi pea ‘i he kapiteni taki lelei tahá na‘e foaki ia kia Lisiate ‘Ulufonua mei he timi ‘a Lavengamâlié.

Na‘e foaki mo e pale $100 ki he veesi lauloto lelei tahá ‘a ia na‘e ma‘u ‘a e pale fika uá ‘e Vaini mo e $200 pea ikuna‘i ‘e Lavengamâlié mo e $500.

Na‘e ‘i ai foki mo e pale $500 ki he faiako mo e pule lelei tahá ‘o ha timi ‘a ia na‘e foaki ia kia Siaosi ‘Atiola pea mo Sione Vunipola.

Na‘e foaki foki mo e pale $200 kia ‘Aisea ‘Ahokovi mei he Kautaha Si‘i Kae Olá ki he‘ene tokoni‘i ‘a e ngaahi timí ‘aki ‘enau ngaue‘aki ‘a e falefakamalohisino ‘o Inga Tuingamala.

Ko e peletí na‘e ikuna ia ‘e Fasi/Ma‘ufanga mo e $8000 hili ‘enau uipi ‘a Ha‘ateiho ‘aki ‘a e kai18-10 pea $6000 ‘a Ha‘ateiho, $5000 ‘a Lavengamâlie ki he fika tolu pea toki fika fâ ‘a Kolomotu‘a mo e $4000.

Na‘e foaki ‘a e ngaahi palé ‘e he ‘Eiki Minisitâ Polisi, Clive Edwards ‘a ia ko e fakaafe fakalangilangi ‘o e ‘ahó.