Mahanga e Tu‘ilokomaná mo e Ha‘amongá ‘i he fe‘auhi kilikiti ‘a Lavengamâlié
Fa‘u ‘e Tevita K. Takitaki

Tupu mei ‘uha lahi lolotonga ‘a e fainolo ki he pale $10000 ‘o e fuofua fe‘auhi kilikiti ‘a Lavengamâlie ‘i he Falaite kuo‘osí na‘e loto taha ai ‘a e kau va‘inga ‘o e Tu‘ilokomaná mei Tokomololo mo e Ha‘amongá mei Niutoua fakataha mo e komití kena mahanga.

Neongo na‘e ‘uluaki tâ ‘a e Tu‘ilokomaná ‘o ma‘u ‘a e kai ‘e 149 kuo nau ‘osi kotoa ‘i he mate ka ‘i he tâ tulikai ‘a e Ha‘amongá na‘e ma‘u ‘a e kai ‘e 35 kuo mate ‘enau toko fâ mo e tô ‘a e ‘uhá.

Ko hono mo‘oni na‘e ta‘e‘iloa pe ko hai ‘a e timi ‘e ikuná ka ‘i he fakakaukau fakapotopoto mo fakalotu ‘a e ongo kapitení na‘a na lototaha leva ke na vahevahe tatau ‘a e pale ki he ‘uluakí mo e pale ki he fika uá ‘a ia tena taki $7500.

Na‘e sai pe ‘a e mala‘e ki he kau tâ ka ki he kau teká mo e kau tautua‘a na‘e fu‘u hekeheke ‘aupito ‘a e mala‘e kia kinautolu ka ‘i he tui tatau ‘a e ongo kapitení na‘e ta‘ofi ai pe ‘a e tau ni.

Kapau na‘e ‘ikai ‘uha kae tulikai ‘a e Ha‘amongá ‘oku tau tui koha toki tâ tulikai ia ‘e mâlie he neongo ‘a e hâ ngali faingofua ‘a hono tuli‘i ‘a e kaí ka ‘oku ta‘e‘iloa ‘a e ola ‘i he ‘osi ‘a e va‘ingá.

‘ Oku hangê ‘oku ‘ikai kau lelei ‘eni ki he komiti ‘oku nau fakalele ‘a e fe‘auhí ka ‘oku ngali fakalotu ange ‘a e fakakaukau ‘a e ongo kapitení ke tuku â kena vahevahe kae toki fai ha heliaki ‘i he ta‘u kaha‘u mo mahino ‘a e timi ‘oku hau mo‘oni ‘i he kilikití ‘i Tonga ni.

‘ I he fe‘auhi foki ko ‘eni ‘oku lava ke kau katoa kiai ‘a e ngaahi timi ‘e 10 mei he ongo komiti kilikiti ‘a Tongá ‘a ia ‘oku tau sio atu koha fakakaukau lelei ‘eni ‘a Lavengamâlie ke feinga‘i kena taha â ‘i he ‘Eiki ko Sisu Kalaisi kae tuku â ‘a e fakafa‘afa‘ahi.

‘ Ikai koia pe ka ‘oku feinga ‘a e fe‘auhi ‘a Lavengamâlie ke tataki ‘a e to‘utupu ki he ‘Eiki he ko e taimi matu‘aki faingata‘a taha ‘eni ki he to‘utupu ‘a e ngaahi taimi mâlôlô ‘o e Kilisimasí mo e ta‘u fo‘oú.

Kaekehe ‘oku faka‘amu ‘a e komiti ‘oku nau fakalele ‘a e fe‘auhi kilikití ke nau fai ha ngâue kenau taha ‘i he ‘Eiki kae tuku â ‘a e fêfusiakí he taumai â ‘e ma‘u ai ha ola ‘oku lelei ki he fonuá.

‘ Oku totonu ke fakamâlô le‘olahi ‘a e TASA ki he ngâue lahi mo ma‘ongo‘onga ko ‘eni kuo fai ‘e he Siasi Tokaikolo ma‘a Kalaisi pea ‘oku totonu kena fakataha mo fokotu‘utu‘u fo‘ou kae foki ‘a e sipoti kilikití ki he tu‘unga na‘a nau a‘usia ‘i he 2002.

Kaekehe ‘i he ‘uluaki tâ ‘a e Tu‘ilokomaná na‘e tu‘ukimu‘a mei he timi ni ‘a Tatisi Kivalu pea pehê kia Ma‘ulupe Pale ‘a ia na‘e tâa‘i ‘e Tatisi ‘a e kai ‘e 40 kae 32 ‘a Ma‘ulupe.

‘ I he tangata teka lelei ‘a e Ha‘amongá na‘e takimu‘a mai ai ‘a e tangata teka vilo koia ko Kaluseti ‘Ofahulu ka ‘i he taimi tatau na‘e faka‘amu ‘a e tangata ni kene a‘u ki he tâ ka na‘e ‘ikai tupu mei he ‘uhá.

‘ I he pale ki he fika tolú na‘e ikuna ia ‘e he Ngalufânifó mei Afâ ‘a ia ko e $4000 pea ‘i he fika fâ na‘e foaki ‘a e $3000 koia ma‘ae South City mei Tokomololo.

‘ I he pale ki he tangata tâ lelei taha ‘o e fe‘auhi na‘e ma‘u ‘a e $500 koia ‘e Kaluseti ‘Ofahulu ‘a ia na‘a ne tâa‘i ‘e ia ‘a e kai ‘e 107 mei he Ha‘amonga fakataha mo e pale $500 ki he tangata va‘inga lelei taha ‘o e fe‘auhí.

‘ I he tangata teka lelei taha na‘e ikuna ia ‘e Livi Pese mei he Vai ko ‘Oa´ mei Puke, tokotaha tautua‘a lelei taha na‘e ikuna ‘a e pale $500 koia ‘e Siaosi Finau mei he Tu‘ilokomaná.

Na‘e foaki foki mo e pale $500 ki he Tu‘ilokomaná ki he teunga faka‘ofo‘ofa taha mo tohi kiai ‘a e veesi laulotó mo e $100 kia Semi Halanukonuka ki he fakamaau‘i ‘o e ‘u va‘ingá.

Ka ‘i he hala na‘e fou hake ai ‘a e Tu‘ilokomaná ki he fainoló na‘a na semifainolo ai mo hono kaungâ‘api pe mei Tokomololo ko e South City ka na‘e vevela‘i pe ‘e he Tu‘ilokomaná ‘aki ‘a e kai 214-91.

Ko e kau va‘inga foki ‘a e Tu‘ilokomaná ko kinautolu na‘a nau kamata‘i mai ‘a e South City ka ‘i he fa‘ahi ua ‘a e komití na‘e pau leva ke mavahe ‘a e kau va‘inga ko ‘eni ki he Tu‘ilokomaná.

‘ I he semifainolo ‘a e Ngalufânifo mo e Ha‘amonga mahalo ko e tau mâlie taha ‘eni ‘i he fe‘auhi kilikiti ‘a Lavengamâlié.

Neongo ‘ena vâofi ka na‘e ‘ikai tena toe lau maheni kana lilima‘a pe kohai koâ ‘e a‘u ki hono tau‘i ‘o e pale $10000 ‘a Lavengamâlie.

Na‘e ‘uluaki tâ ‘a e Ha‘amongá ‘o ma‘u ‘a e kai 277 kuo ‘osi ‘a e ‘ová ka ‘i he tâ tulikai ‘a e Ngalufânifó na‘e ma‘u pe ‘a e kai ‘e 227 kuo nau mate kotoa.

‘ Oku mahino ‘a e mâlie ‘a e fetaulaki ‘a e ongo timi ni mei he lahi ‘o e kaí ka ‘i he taimi tatau mahalo tena toki teuteu lelei ki he ta‘u kaha‘u kena toki fetaulaki ai.