Ngoto e vaka Tonga ‘i Algeria

NEONGO kuo loa hono ta’ofi ‘e he pule’anga Tonga´ ‘a ‘enau fo’i polokalama lesisita vaka na’e ngalivale ai e fonua´ fakavaha’apule’anga´, ka ‘oku mahino ‘eni ‘oku kei lahi pe e ngaahi vaka ia ‘oku nau kei lele holo pe mo e fuka Tonga´.

‘I he ‘aho Sapate´ na’e ngaue atu ai e kau fakahaofi mo’ui mei Sipeini mo Algeria ‘o fakahaofi ha kau kauvaka ‘e toko 12 mei he vaka ko e Load Star mei he konga tahi Meteteliane´ maile nai ‘e 80 ki he fakatokelau ‘o Algeria.

Ko e vaka uta koloa ‘eni pea na’a ne lolotonga fakahoko ha uta ukamea. Ko e vaka ni ‘oku kei lesisita pe he pule’anga Tonga´ pea ‘i he Tokonaki´ ne ma’u ai ha ui tokoni mei he Load Star. Ka ne ‘ikai ke fuoloa kuo mate e fetu’utaki fakateleletio ia mei he vaka´. Ko ia ne tuku atu ai ‘e he ongo fonua´, Sipeini mo Algeria ‘enau ongo timi ke fekumi ki he vaka ni ‘o ma’u mai ai e kau kauvaka´ ka ‘oku nau tui kuo ‘osi ngoto e vaka´ ia.

Ko e fo’i ngaue ko ia ki he lesisita vaka´ ko e fo’i ‘aliaki ‘a e pule’anga Tonga´ ke ma’u tokua ha pa’anga vave mei he lesisita e ‘u vaka muli´ kae hala ‘ataa ha’anau ngaue ‘anautolu ke sivi faka’auliliki e ‘uu vaka´ pe ‘oku taau ke folau tahi pe ‘ikai. Ko e fo’i tanaki pe e pa’anga lesisita´ ‘i ha founga faingofua pea na’e ‘ulu’i ‘ofisi ‘i Kalisi.

Ko e pango he na’e iku hola e motu’a ia na’a falala mo tuku atu ki ai ‘e he pule’anga Tonga´ ke ne fai e ngaue´ mo e konga lahi e pa’anga ne ma’u mei he lesisista vaka´ kae ma’ave’ave e hingoa ia ‘o Tonga´ he ngali vale´. Ne toki fakata’ane hifo ‘a Tonga kuo ‘osi ‘i ai e vaka ia ofi he 170 kuo ‘osi lesisita ‘i Tonga pea tenau kei ngaue’aki pe fuka Tonga´ kae ‘oua ke ‘osi ‘enau aleapau ne nau fefakamo’oni ki ai´. ‘Oku kau leva e vaka ne toki ngoto´ he ngaahi vaka ko ia´.

‘Oku kau foki e pule’anga Vanuatu mo e Marshall Is ‘i he polokalama lesisita vaka´ ka ‘oku fakalele fakalelei ‘enau ngaue´ ‘anautolu ‘o ‘ikai ke ‘ai noa’ia mo taumu’a ke fakatupu pa’anga ‘i ha founga vave mo kakaa ‘o hangee ko ia ne fai ‘e Tonga´.